ԱՄԷ-ի արտգործնախարար Աբդուլլահ բըն Զայեդն իսրայելցի իր պաշտոնակից Յաիր Լապիդի հետ հեռախոսազրույցի ընթացքում կարևորել է Երուսաղեմի Ալ-Աքսա մզկիթում իրավիճակի հանդարտության պահպանումը:
Էմիրաթական WAM պետական լրատվամիջոցի փոխանցմամբ՝ հեռախոսազրույցի ընթացքում նախարարները մտքեր են փոխանակել նաև երկկողմ հարաբերությունների և համագործակցության հեռանկարների շուրջ:
Զայեդն ընդգծել է, որ անհրաժեշտ է հարգել Հորդանանի «կարևոր պատմական դերը»՝ Երուսաղեմի սրբազան վայրերը պահպանելու և հոգածություն դրսևորելու գործում՝ համաձայն միջազգային իրավունքի:
Էմիրաթցի արտգործնախարարը կարևորել է, որ «կանխվի ոչ մուսուլման այցելուների մուտքը Ալ-Աքսա մզկիթ վաղվանից մինչև ուրբաթ՝ Ռամադան ամսվա ավարտը»:
Նշենք, որ վերջին շրջանում Երուսաղեմում իսրայելա-պաղեստինյան զգալի լարվածություն է նկատվում: Ավելի վաղ տեղեկացրել էինք, որ Ալ-Աքսա մզկիթում իսրայելական ոստիկանության ուժերի և մուսուլման հավատացյալների միջև բախումներ են եղել: Լարվածությունը շարունակվել է նաև Տաճարի լեռան մոտակայքում:
Երուսաղեմում ծավալվող իրադարձությունների պատճառով ԱՄԷ-ում Իսրայելի դեսպան Ամիր Հայեկը կանչվել էր երկրի արտգործնախարարություն: Նրան փոխանցվել էր ԱՄԷ-ի խիստ դժգոհությունը Երուսաղեմում և Ալ-Աքսա մզկիթում աճող լարվածության շուրջ:
Հետևեք մեզ տելեգրամում
