Իրաքի վարչապետի լիազորություններն իրականացնող Մուստաֆա Կազեմին հայտարարել է, որ Իրանի նախագահ Էբրահիմ Ռայիսի հետ համաձայնության են եկել հանդարտեցնել տարածաշրջանը:
Այս մասին Կազեմին հայտնել է Իրանի նախագահի հետ համատեղ մամուլի ասուլիսում՝ Թեհրան կատարած այցի շրջանակներում:
Իրաքի վարչապետը նաև ավելացրել է, որ համաձայնություն է կայացվել հաղթահարել տարածաշրջանում պարենի անվտանգությանն առնչվող մարտահրավերները, ինչպես նաև ամրապնդել Իրաքի և Իրանի միջև երկկողմ համագործակցությունը:
«Իրաքի հետ հարաբերությունները սովորական հարաբերություններ չեն, այլ խոր բնույթ ունեն, որը բխում է մշակույթից և հավատամքից»,- իր հերթին նշել Էբրահիմ Ռայիսին համատեղ մամուլի ասուլիսում՝ ավելացնելով, որ «տարբեր ոլորտներում երկու երկրների հարաբերությունները զարգացնելու կամք կա»:
Նշենք, որ Իրաքի վարչապետ Մուստաֆա Կազեմին Սաուդյան Արաբիա կատարած այցից հետո կիրակի ժամանել էր Թեհրան: Կազեմին այցի շրջանակներում հանդիպել էր նաև Իրանի ԱԳ նախարար Հոսեյն Ամիր Աբդոլլահիանի հետ:
Երկուշաբթի մամուլի ասուլիսի ժամանակ Իրանի ԱԳՆ խոսնակ Սաիդ Խաթիբզադեն հայտարարել էր, որ «Կազեմիի այցի նպատակը Ռիադի և Թեհրանի միջև բանակցությունների վերսկսումն է»:
Հետևեք մեզ տելեգրամում
