ԱՄՆ կառավարությունը և նախագահը պետք է վերանայեն իրենց տարածաշրջանային արտաքին քաղաքականությունը և հրաժարվեն «սիոնիստական ռեժիմին» աջակցելու քաղաքականությունից։ Այս մասին հայտարարել է Իրանի նորանշանակ ԱԳՆ խոսնակ Նասեր Քանանին մամուլի ասուլիսի ընթացքում՝ անդրադառնալով Մերձավոր Արևելքում ԱՄՆ-ի քաղաքականությանը: Տեղեկությունը փոխանցում է IRNA լրատվամիջոցը:
Նորանշանակ խոսնակն անդրադարձել է նաև Իրանի միջուկային բանակցությունների վերջին զարգացումներին՝ հավելելով, որ բանակցությունները շարունակվում են հաղորդագրությունների փոխանակման միջոցով՝ Ամիր Աբդոլլահիանի ու Բորելի միջև, կամ Ալի Բաղերի և Մորայի միջև: Նրա խոսքով՝ շուտով կորոշվի բանակցությունների վերսկսման ժամանակը և վայրը:
Քանանին դրական է գնահատել իրանա-սաուդական բանակցությունները՝ նշելով, որ հաջորդ փուլում կոնկրետ քայլեր կձեռնարկվեն։
Նա նաև շեշտել է, որ Իրանի, Թուրքիայի և Ռուսաստանի միջև համագործակցության մակարդակի բարելավելու ուղղությամբ դրական կամք կա՝ անդրադառնալով Պուտինի և Էրդողանի Թեհրան կատարելիք այցին:
Հետևեք մեզ տելեգրամում
