Ադրբեջանում Իրանի նախկին դեսպան, տարածաշրջանային հարցերով փորձագետ Մոհսեն Փաքայինը մեկնաբանել է Կապանում հյուպատոսություն բացելու Իրանի ցանկությունը: Այս գործընթացում նա մի քանի պատճառ է առանձնացրել:
Region Monitor-ը, հղում կատարելով իրանական Khabar Online լրատվամիջոցին, ներկայացնում է այդ պատճառները, որոնք հետևյալն են.
«1․Ադրբեջանի և Հայաստանի միջև 44-օրյա պատերազմից հետո եռակողմ համաձայնագրի ստորագրումը խոստանում էր հաստատել խաղաղություն։ Կապանում Իրանի գլխավոր հյուպատոսության բացումը նշանավորում է Իրանի գործնական քայլը՝ ուղղված հակամարտությունների խաղաղ կարգավորմանն ու տարածաշրջանում խաղաղության ու կայունության հաստատմանը։
2․ Ադրբեջանի և Հայաստանի միջև պատերազմի ավարտը նաև լավ հնարավորություններ ստեղծեց տնտեսական համագործակցության համար։ Իրանի ուժեղ ներկայությունը կովկասյան տարածաշրջանում կարող է ուժեղացնել Իրանի առևտուրը Եվրասիական տնտեսական միության հետ։
3․ Կապանում Իրանի գլխավոր հյուպատոսությունը կարող է ուժեղացնել Թեհրանի և Երևանի տարանցիկ կարողությունները՝ միաժամանակ լուծելով և նվազեցնելով բեռնատարների վարորդների խնդիրները։ Հաշվի առնելով Պարսից ծոցից դեպի Սև ծով և Եվրոպա միջանցքի կառուցումը և Ռուսաստանի, Վրաստանի և Հնդկաստանի հետ համագործակցության ակտիվացումը՝ առավել կընդգծվի հյուպատոսության դերը տնտեսական գործընկերների ամրապնդման գործում։
4․ Իրանի 13-րդ կառավարության արտաքին քաղաքական առաջնահերթություններից է հարևան երկրների հետ համագործակցության մակարդակի ընդլայնումը հատկապես տնտեսական ոլորտում։ Հայաստանի հետ հարաբերությունների ամրապնդումը գլխավոր հյուպատոսության ստեղծման միջոցով կարող է դիտարկվել Իրանի արտաքին քաղաքականության շրջանակներում։ Որքան բարձր է հարևանների միջև տնտեսական փոխգործակցության մակարդակը, այնքան բարձր է կայունությունը, անվտանգությունը և խաղաղությունը:
5․ Իրանը բարիդրացիական հարաբերություններ ունի Հարավային Կովկասի երկրների, հատկապես Ադրբեջանի և Հայաստանի հետ։ Կապանում գլխավոր հյուպատոսության ստեղծումը ոչ միայն դեմ է կովկասյան երկրներից որևէ մեկին, այլ, ինչպես Նախիջևանում Իրանի գլխավոր հյուպատոսությունը, այն հետամուտ է տարածաշրջանային անվտանգության ամրապնդման և տնտեսական ու մշակութային համագործակցության զարգացմանը։ Այս հյուպատոսության ստեղծման խորհրդանշական ուղերձն այն է, որ տարածաշրջանում այլևս օկուպացված երկիր և պատերազմ չի լինելու»։
Հետևեք մեզ տելեգրամում
