Քաղաքական ո՞ր ուժերն են պայքարելու Իսրայելի խորհրդարանական ընտրություններում

Վաղը՝ նոյեմբերի 1-ին Իսրայելում կայանալու են 5-րդ խորհրդարանական ընտրությունները վերջին 4 տարում:

Երկրում քաղաքական պայքարող ուժերը բաժանվել են երկու բլոկների՝ «Միայն Բիբին» [Իսրայելի նախկին վարչապետ Բենիամին Նեթանյահու] և «Ցանկացած մեկը բացի՝ Բիբիից» կարգախոսներով առաջնորդվող:

Նեթանյահուի դաշինքում նրա գլխավորած «Լիկուդ» (թարգմ.՝ միավորում) կուսակցությունից բացի ներառված են նաև ծայրահեղ աջաթևյան «Կրոնական սիոնիստական կուսակցությունը»՝ Բեցալել Սմոտրիչի գլխավորությամբ և ևս երկու հարեդի (ուղղափառ հուդայականներ, ովքեր խստորեն հավատարիմ են հրեական ավանդույթներին և հալախային՝ հրեական կրոնական օրենքներին) կուսակցություն՝ «Միացյալ Թորայի կուսակցությունը» և «Շասը» (հապավումի թարգմանությունը՝ Թորայի պահապանները):

Ընտրություններում պայքարող մյուս քաղաքական բլոկում են գործող վարչապետ Յաիր Լապիդի «Յաշ Ատիդ» (թարգմ.՝ Ապագա կա) կուսակցությունը, պաշտպանության նախարար Բեննի Գանցի «Ազգային միասնություն» կուսակցությունը, «Մեր տունը Իսրայելն է» կուսակցությունը և երկու ձախաթևյան կուսակցություն՝ «Մերեցը» (թարգմ.՝ ուժ/եռանդ) և «Իսրայելի աշխատանքային կուսակցությունը», ինչպես նաև արաբական «Ռաամ» կուսակցությունը՝ Մանսուր Աբբասի գլխավորությամբ:

Հավելելնք, որ հարցումների կանխատեսումներով՝ 120 տեղանոց Քնեսեթում Նեթանյահուի դաշինքը ունենալու է 59 կամ 60 մանդատ: 56 կամ 57 մանդատ կունենան գործող իշխանությունները, իսկ մնացած տեղերը բաժին են հասնելու արաբական կուսակցություններին: