Այսօր՝ փետրվարի 18-ին, Թբիլիսիում խորհրդարանի լիագումար նիստին զուգահեռ ընդդիմությունը բողոքի ակցիա է անցկացնում: Aliq.ge-ի հաղորդմամբ՝ ընդդիմության ներկայացուցիչները հավաքվել են խորհրդարանի մուտքերի մոտ և հերթական անգամ «ամոթի միջանցք» են կազմել իշխող կուսակցության պատգամավորների համար:
Այս անգամ ցուցարարները բողոքում են գլխավոր դատախազ Իրակլի Շոթաձեի ընտրության դեմ, որը ըստ ընդդիմության Բիձինա Իվանիշվիլիի խամաճիկն է և անելու է այն, ինչ ասի Իվանիշվիլին:
Ակցիայի ընթացքում իրավապահների և ցուցարարների միջև մի քանի փոքր միջադեպ է տեղի ունեցել: Իրավապահները փորձել են ցուցարարներին տեղափոխել մայթերի վրա, ինչին հակառակ ցուցարարները շարժվում են դեպի փողոց` փորձելով փակել այն:
Հիշեցնենք, այսօր խորհրդարանի լիագումար նիստի ընթացքում զեկույցով է հանդես գալու խորհրդարանի նախագահ Արչիլ Թալակվաձեն, ապա օրենսդիրները լսելու են գլխավոր դատախազի թեկնածու Իրակլի Շոթաձեին: Այս շաբաթվա լիագումար նիստին խորհրդարանը կընտրի Վրաստանի գլխավոր դատախազին:
Հետևեք մեզ տելեգրամում
