Կատարում դեկտեմբերի 18-ը նշում են որպես Ազգային տոն՝ ի հիշատակ Կատարի միավորման տարեդարձի Ալ-Թանիի դինաստիայի ներքո: Պատմականորեն սա այն օրն է, երբ շեյխ Ջասիմ բն Մուհամմադ բըն Թանին միավորեց Կատարը որպես մեկ պետություն դեռևս 144 տարի առաջ՝ 1878 թվականին:
Թեև այս օրը որպես տոն առաջին անգամ սահմանվել է 2007 թվականին Էմիր շեյխ Թամիմ բն Համադ Ալ-Թանիի կողմից, այնուամենայնիվ, Ալ-Թանի տոհմն ավելի վաղ ժամանակներից է գործում:
Թանիի տոհմը արաբական հնագույն և հզոր ցեղերից է, որի հիմնադրման տարեթիվը հասնում է մինչև 17-րդ դար: Ավելին, Ալ-Թանին սերում է Բանու Հանզալա ցեղից, որն էլ իր հերթին ավելի մեծ և զորեղ Բանու Թամիմ ցեղի ճյուղն է:
Ժամանակի ընթացքում Ալ-Թանիները բնակություն են հաստատել այժմյան Կատարում և նրանց տոհմը սկսել է ավելի մեծ ազդեցություն և հզորություն ձեռք բերել թերակղզում:
Երկար տարիներ Ալ-Թանիի տոհմը իշխանության համար պայքարում էր արաբական մրցակից մյուս ցեղի՝ Խալիֆայի տոհմի հետ, որն այսօր Բահրեյնում հայտնի իշխող թագավորական տոհմ է: Այս հակասություններն ու մրցակցությունն ի վերջո հանգեցրին Կատարի միավորմանը: Հետևաբար, 1851 թվականին Մուհամմադ բն Ալ-Թանին դարձավ Կատարի առաջին էմիրը:
Սակայն սա ամենևին չէր նշանակում, որ Մուհամմադ բն Ալ-Թանին Կատարում լիակատար վերահսկողություն ուներ: Չմոռանանք, որ այդ ժամանակահատվածում Կատարն Օսմանյան կայսրության մաս էր կազմում:
Ավելի ուշ՝ 1893 թվականին Մուհամմադի իրավահաջորդ Ջասիմ բն Մուհամմադ Ալ-Թանին, Ալ-Վաջբայի ճակատամարտում հաղթանակ տանելով օսմանյան բանակի նկատմամբ, Կատարը դարձրեց ավելի անկախ և ինքնավար: Իսկ 1913 թվականին, երբ Օսմանյան կայսրությունը հրաժարվեց Կատարի ինքնիշխանության նկատմամբ որևէ պահանջից, Կատարը դարձավ բրիտանական պրոտեկտորատ:
Կատարը լիովին անկախացավ միայն 1971 թվականին: Անկախությունից հետո Պարսից ծոցի այս փոքրիկ պետությունը՝ 3 մլն բնակչությամբ, աննախադեպ աճ գրանցեց:
Բնական գազի իր հսկայական պաշարների օգտագործման շնորհիվ Կատարը կարողացավ զգալի հարստություն կուտակել, իսկ ներկայումս հանդիսանում է աշխարհի ամենահարուստ երկրներից մեկը: Կատարին է պատկանում արաբական աշխարհի ամենամեծ և ամենաազդեցիկ լրատվամիջոցներից մեկը՝ «Aljazeera»-ն: Հարկ է նշել, որ Կատարը, չհանդիսանալով ՆԱՏՕ-ի անդամ-պետություն, համարվում է ԱՄՆ-ի գլխավոր դաշնակիցը:
Իսկ այն փաստը, որ Կատարը հյուրընկալում է 2022 թվականի Ֆուտբոլի աշխարհի առաջնությունը, երկրի աճի, հզորության և ազդեցության հերթական վկայությունն է:
Ազգային տոնը Կատարում մի շարք տոնակատարություններով է նշվում՝ այդ թվում հրավառությունների, շքերթների, ինչպես նաև մշակութային բազմաթիվ տոնակատարությունների կազմակերպմամբ:
Այս տարի առավել ևս նշանավորվում է Կատարի Ազգային տոնը՝ 2022 թվականի Ֆուտբոլի աշխարհի առաջնության եզրափակիչով, որտեղ մրցեցին Ֆրանսիայի և Արգենտինայի հավաքականները:
Հետևեք մեզ տելեգրամում
