Իսրայելի վարչապետ Բենիամին Նեթանյահուն հայտնել է, որ Իսրայելը օգնություն է ուղարկում Սիրիա և Թուրքիա՝ ավերիչ երկրաշարժի հետևանքները մեղմելու համար:
Նեթանյահուն հավելել է, որ Իսրայելը դիվանագիտական ուղիներով օգնության խնդրանք է ստացել Սիրիայից, և պատրաստ է այն տրամադրել:
«Խնդրանք է ստացվել նաև Սիրիայում երկրաշարժի հետևանքով տուժած բազմաթիվ մարդկանց համար»,- Նեթանյահուի խոսքերը մեջբերել է The Times of Israel պարբերականը:
Պարբերականի աղբյուրները հայտնել են, որ Իսրայելի ռազմական և անվտանգային մարմիններն արդեն ուսումնասիրում են, թե ինչպես օգնություն տրամադրեն Սիրիային:
«Թուրքիայի կառավարության խնդրանքով հանձնարարել եմ անհապաղ պատրաստվել բժշկական և փրկարարական օգնություն ցուցաբերելուն: Արտաքին գործերի և պաշտպանության նախարարներն արդեն կապի մեջ են իրենց գործընկերների հետ, և առաջիկա մի քանի ժամում մենք կամբողջացնենք պատվիրակության մեկնելու գործընթացը որքան հնարավոր է շուտ»,- հայտարարել է Նեթանյահուն:
Հետևեք մեզ տելեգրամում
