Իրանը ողջունում է վերջին շրջանում Սիրիայի և տարածաշրջանային երկրների միջև հարաբերությունների վերականգման դրական տեղաշարժը։ Այս մասին հայտարարել է Իրանի ԱԳ նախարար Ամիր Աբդոլլահիանը՝ սիրիացի իր գործընկեր Ֆեյսալ Ալ-Միկդադի հետ համատեղ մամուլի ասուլիսի ժամանակ:
Ադոլլահիանը նշել է, որ սիոնիստները» տեղ չունեն տարածաշրջանի ապագայում, իսկ տարածաշրջանի երկրները ամուր քայլեր պետք է ձեռնարկեն երկխոսության և համագործակցության ուղղությամբ։
Իրանի արտգործնախարարը շեշտել է, որ Իրանը ողջունում է Իրանի, Սիրիայի, Թուրքիայի և Ռուսաստանի քառակողմ հանդիպումը՝ ավելի մեծ համագործակցության հասնելու և տարածաշրջանում ճգնաժամից դուրս գալու նպատակով։
Իր հերթին Սիրիայի արտգործնախարար Ֆեյսալ Միկդադը բարձր է գնահատել երկրաշարժից հետո Իրանի ցուցաբերած օպերատիվ օգնության տրամադրումը: Միկդադի խոսքով՝ երկրաշարժից հետո որոնողափրկարարական աշխատանքներին մասնակցած առաջին երկրներից մեկն Իրանն է, իսկ Հալեպ ու Դամասկոս հասած առաջին ինքնաթիռները դարձյալ Իրանից էին։
Սիրիայի արտգործնախարարը նաև հավելել է, որ միջազգային զարգացումների վերաբերյալ երկու երկրների դիրքորոշումները «նման են միմյանց»:
Նշենք, որ Իրանի ԱԳ նախարար Հոսեյն Ամիր Աբդոլլահիանը մարտի 9-ին մեկնել էր Սիրիա և այցելել երկրաշարժից տուժած շրջաններ: Աբդոլլահիանը հանդիպել է Սիրիայի նախագահ Բաշար Ալ-Ասադի և սիրիացի իր գործընկեր Ֆեյսալ ալ-Միկդադի հետ։
Հետևեք մեզ տելեգրամում
