Իրանի ԱԳՆ խոսնակ Նասեր Քանանին, անդրադառնալով Իրանի և Սաուդյան Արաբիայի միջև երկկողմ հարաբերությունները վերականգնելու համաձայնությանը, նշել է, որ գործընթացը մեկուկես տարվա դիվանագիտական բանակցությունների արդյունք էր:
«Մենք որոշ երկրների միջնորդությամբ Իրանի և Սաուդյան Արաբիայի միջև երկխոսության տարբեր փուլեր ենք անցկացրել։ Սի Ցզինպինի Էր-Ռիադ և Էբրահիմ Ռայիսիի Պեկին այցելություներից հետո ծագեց Պեկինում Սաուդյան Արաբիայի և Իրանի միջև երկխոսություն անցկացնելու գաղափարը»,- մամուլի ասուլիսի ժամանակ հայտարարել է խոսնակը:
Քանանին ընդգծել է, որ երկկողմ հարաբերությունները վերականգնելու համաձայնագրի ստորագրումից հետո պետք է վերսկսվեն հարաբերությունները և առավելագույնը երկու ամսվա ընթացքում վերաբացվեն դեսպանատները Թեհրանում և Էր-Ռիադում, ինչպես նաև հյուպատոսությունները Մաշհադում և Ջիդդայում։
«Իրանի և Սաուդյան Արաբիայի արտգործնախարարությունները պայմանավորվածություններ են ձեռք բերել ԱԳ նախարարների հանդիպման համար, որը, հուսով ենք, տեղի կունենա մոտ ապագայում»,-հավելել է խոսնակը։
Բարձր գնահատելով Չինաստանի միջնորդական դերը Սաուդյան Արաբիայի և Իրանի միջև հարաբերությունների կարգավորման գործում՝ Քանանին շեշտել, որ Չինաստանը իր բարի կամքով կարող է կարևոր դեր խաղալ տարածաշրջանում խաղաղություն, կայունություն և անվտանգություն ստեղծելու գործում։
Հետևեք մեզ տելեգրամում
