Բեյրութի Ռենե Մուավադի անվան ավագ դպրոցում, ինչպես նաև հանրային շատ դպրոցներում ամիսներ շարունակ դասապրոցեսն ու ուսումնական կյանքը կանգ է առել: Ուսուցիչները բողոքի ցույցեր են անցկացնում Լիբանանի կրթության նախարարության շենքի դիմաց՝ աշխատավարձերի բարձրացման պահանջով:
Al Arabiya-ն գրում է, որ շուրջ 100 ուսուցիչ միացել է նախարարության շենքի մոտ անցկացվող ցույցին՝ արգելափակելով քաղաքի երթևեկությունը և ցուցապաստառներ պահելով աշխատավարձերի բարձրացման պահանջով։
Ուսուցիչները պահանջում են ճշգրտված աշխատավարձեր, տրանսպորտի փոխհատուցում և առողջապահական ապահովագրություն։ Կառավարությունն առաջարկել է միայն մասնակիորեն հոգալ տրանսպորտային ծախսերը՝ հավելելով, որ ավել բյուջե չունի։
Al Arabiya-ի տեղեկացմամբ՝ անցյալ շաբաթ դպրոցները մասամբ վերաբացվեցին, երբ որոշ ուսուցիչներ վերադարձան աշխատանքի, մինչդեռ շատերը նախընտրեցին շարունակել գործադուլը:
Նշենք, որ Լիբանանում տնտեսական աննախադեպ ճգնաժամ է տիրում: Օրերս հաղորդվում է, որ ռեկորդային անկում է ապրել ազգային արժույթը. արժութային շուկայում 1 դոլարը համարժեք է 100 հազար լիբանանյան ֆունտի:
Լիբանանն անցյալ տարվանից չունի նաև նախագահ: Երկրում գործում է միայն ժամանակավոր կառավարությունը:
Հետևեք մեզ տելեգրամում
