Ժամանակն է, որ Սաուդյան Արաբիան խաղաղություն հաստատի Հարավային Կովկասում՝ օգտագործելով Ադրբեջանի հետ իր բարեկամությունը և Հայաստանի հետ նոր բարեկամության հաստատումը: Նման տեսակետ է ներկայացվել սաուդական «ARABNEWS» անգլալեզու հեղինակավոր լրատվամիջոցում հրապարակված հոդվածում:
Հոդվածում նշվել է, որ Հարավային Կովկասը Մերձավոր Արևելքի «հյուսիսային բակն» է: Այն, ինչ տեղի է ունենում Հարավային Կովկասում, ոչ միայն սպառնում է Մերձավոր Արևելքի կայունությանն ու ներուժին, այլև ուսուցանում է հեռատեսություն:
Ընդգծվել է, որ արաբական աշխարհը պետք է ակտիվ ուշադրություն դարձնի և Կովկասի խնդիրների նկատմամբ անտարբեր դիրքորոշում չորդեգրի, այլ ռազմավարական առումով կանխի երկարաժամկետ աշխարհաքաղաքական և սոցիալ-տնտեսական վտանգները:
Հոդվածում հիշեցվել է, որ «1918թ. ապրիլի 29-ին Մեքքայի շերիֆ Հուսեյն բին Ալին հրամանագիր է արձակել սուրբ քաղաքից՝ կոչ անելով մուսուլմաններին պաշտպանել հայերին մահից և բռնի անհետացումից՝ արհամարհելով Օսմանյան կայսրության պաշտոնական քաղաքականությունը»:
Հոդվածում երեք ոլորտ է ընդգծվել, որում Սաուդյան Արաբիան կարող է միջնորդություն իրականացնել.
1. Սաուդյան Արաբիան բանտարկյալների փոխանակման հարուստ փորձ ունի: Քիչ երկրներ կկարողանան միջնորդել Ադրբեջանի և Հայաստանի միջև գերիների ազատ արձակման հարցում այնպես, ինչպես կարող է իրականացնել թագավորությունը,
2. Սաուդյան Արաբիան ունի երկարամյա բժշկական և հումանիտար լիազորագրեր՝ պատերազմի և հակամարտությունների հանցագործությունների հետևանքով խեղված հիվանդների համար պրոթեզավորում մատակարարելու և բարդ դեպքերի վերականգնման գործում,
3. Սաուդյան Արաբիան ականազերծման մեծ փորձ ունի, որի օգնությամբ Լեռնային Ղարաբաղում հնարավոր կլինի ականազերծում կատարել չեզոք և երրորդ երկրի միջնորդությամբ:
Հետևեք մեզ տելեգրամում
