Երեկ տասնյակ հազարավոր իսրայելցիներ դուրս էին եկել Երուսաղեմ քաղաքի փողոցներ՝ աջակցություն հայտնելու երկրի աջակողմյան կառավարության կողմից նախաձեռնած դատաիրավական բարեփոխումներին:
Ինչպես հայտնում է Aljazeera-ն, ցուցարարները հավաքվել էին Քնեսեթի (խորհրդարանի) շենքի դիմաց: Նրանք ծածանում էին Իսրայելի դրոշը:
Ուշագրավ է, որ երեկվա ցույցերը հազվագյուտ աջակցություն էին դատաիրավական բարեփոխումներին: Երկրում ամիսներ շարունակ ցույցեր էին ընթանում ընդդեմ այդ բարեփոխումների: Ցուցարարները պնդում էին, որ Նեթանյահուի առաջարկած նախաձեռնությունների փաթեթը նվազեցնելու է երկրում դատական իշխանության լծակները:
«Դիմում եմ իմ բոլոր ընկերներին, ովքեր այստեղ են. տեսե՛ք, թե որքան ուժ ունենք մենք»,- ցուցարարների բազմությանը դիմել է Իսրայելի ֆինանսների նախարար Բեզալել Սմոտրիչը:
«Նրանք ունեն լրատվամիջոցներ և կան մեծահարուստներ, ովքեր կֆինանսավորեն նրանց բողոքի ցույցերը, բայց մենք ազգ ունենք: Մենք կուղղենք այն, ինչ պետք է ուղղվի»,- հավելել Սմոտրիչը:
Իսրայելական լրատվամիջոցները գրել են, որ մոտ 80,000 քաղաքացի էր հավաքվել Երուսաղեմում հինգշաբթի օրվա հանրահավաքին: Ցուցարարներից շատերը բերվել էին երկրի այլ շրջաններից:
Հետևեք մեզ տելեգրամում
