Իրանի և Սիրիայի հարաբերությունները ռազմավարական և կարևոր հարաբերություններ են, որոնք շարունակվելու են: Այս մասին հայտարարել է Իրանի նախագահ Էբրահիմ Ռայիսին՝ լիբանանյան հեղինակավոր Al Mayadeen լրատվամիջոցի հետ զրույցում:
«Իրանը, գուցե, միակ երկիրն էր, որ աջակցում էր Սիրիայի իշխող վարչակարգին և դեմ էր կանգնել թաքֆիրական [խմբ.՝ թաքֆիրիզմը իսլամիստական ծայրահեղական գաղափարախոսություն է, երբ մուսուլմանը մեղադրվում է անհավատության մեջ] խմբավորումներին և անջատողական բոլոր շարժումներին և անգամ տարածաշրջանի որոշ երկրներին, որոնք ձգտում էին մասնատել Սիրիան»,- հավելել է Ռայիսին:
Իրանի նախագահը նաև ընդգծել է Սիրիայի տարածքի նկատմամբ կառավարության ինքնիշխանության և ԱՄՆ ԶՈՒ-ի՝ Սիրիայից «արագ հեռանալու» անհրաժեշտությունը:
Զրույցում Ռայիսի անդրադարձել է նաև Սիրիայի վերականգնման գործընթացում Իրանի հնարավոր ներգրավվածությանը:
«Մենք պատրաստ ենք համագործակցել Սիրիայի ժողովրդի և կառավարության հետ: Իրանում ունենք բարձր որակավորում ունեցող տեխնիկական թիմեր և ընկերություններ, որոնք կարող են կարևոր դեր խաղալ Սիրիայի վերականգնման գործում»,- նշել է Իրանի նախագահը:
Պատասխանելով հարցին, թե «արդյոք Սաուդյան Արաբիայի հետ համաձայնությունը կարող է ազդեցություն ունենալ արաբական երկրների հետ հարաբերությունների վրա», Ռայիսին նշել է.
«Մենք պատրաստ ենք վերսկսել դիվանագիտական առաքելությունների աշխատանքը Թեհրանում և Ռիյադում, և պայմանավորվել ենք երկու երկրների միջև բանակցությունների շուրջ, նստել, խոսել և լուծել մեր խնդիրները։ Ինչ վերաբերում է արաբական մյուս երկրներին, ապա նրանք պետք է իրենց որոշումը կայացնեն իրենց ապագայի հետ կապված»:
Հետևեք մեզ տելեգրամում
