Երեք օր շարունակ Իսրայելի ռազմաօդային ուժերը շարունակում են թիրախավորել Գազայի հատվածը: Հրթիռակոծության հետևանքով պաղեստինցի զոհերի թիվն արդեն հասել է 30-ի:
Ինչպես հայտնում է Al Arabiya-ն, երեկ պաղեստինյան «Իսլամական ջիհադ» խմբավորումը հեռահար հրթիռներ էր արձակել Իսրայելի ուղղությամբ, որի հետևանքով սպանվել էր մեկ քաղաքացի: Իր հերթին Իսրայելի բանակը հայտարարել էր, որ իր ռազմաօդային ուժերը խոցել են «Իսլամական ջիհադ» հրթիռային կայանները: Գազայի բնակիչները հայտնել էին, որ պայթյուններ են տեղի ունեցել Ռաֆահ քաղաքի մոտ գտնվող ֆերմաներում: Զոհերի մասին առայժմ տեղեկություններ չկան:
Բացի այդ՝ իսրայելական կողմը պնդում է, որ «Իսլամական ջիհադի» 5 բարձրաստիճան գործիչների է սպանել: Ի պատասխան՝ «Իսլամական ջիհադը» ավելի քան 800 հրթիռներ է արձակել Իսրայելի խիտ բնակեցված հատվածների ուղղությամբ:
Al Arabiya-ն նաև նշել է, որ Իսրայելը Հորդանան գետի Արևմտյան ափին գործողություններ է իրականացրել, որոնց հետևանքով այս տարի սպանվել է 109 պաղեստինցի: Սպանվածների թվի նման ցուցանիշը վերջին երկու տասնամյակի ընթացքում ամենաբարձրն է: Ըստ Associated Press-ի տվյալների՝ սպանվածների առնվազն կեսը գրոհայինների խմբավորումների հետ առնչություններ ունեն:
Հետևեք մեզ տելեգրամում
