Ուկրաինական անօդաչու սարքերը գրոհել են Սոչին. կան վիրավորներ

Սոչին սեպտեմբերի 9-ի երեկոյան ենթարկվել է Ուկրաինայի զինված ուժերի անօդաչու սարքերի հարձակմանը։ Քաղաքում և Սիրիուս ավանում հայտարարվել է անօդաչու թռչող սարքերի և մոտորանավակների հարձակման վտանգ, իսկ փողոցներում միացվել են տագնապի ազդանշանները։ Այս մասին հայտնել է «The Moscow Times»-ը։

Կուբանի օպերատիվ շտաբի հաղորդմամբ՝ Սոչին հարձակման է ենթարկվել ծովային անօդաչու սարքերով, ինչի հետևանքով առափնյա հատվածում հրդեհ է բռնկվել։ Իշխանությունների տվյալներով՝ տուժածների թիվը հասել է 8-ի։ Այլ մանրամասներ չեն հաղորդվել։

Սոչիի քաղաքապետ Անդրեյ Պրոշունինը հայտնել է, որ «բոլոր ուժերն ու միջոցներն աշխատում են քաղաքի պաշտպանության ուղղությամբ», և բնակիչներին հորդորել է մնալ ապաստարաններում։

Ուկրաինական մոնիթորինգային ալիքները հրապարակել են հարձակման կադրերը, որոնցում երևում է կրակոցներ անհայտ թիրախների ուղղությամբ։ Տեսանյութերից մեկում, ըստ ամենայնի, արձանագրվել է օդային անօդաչու սարքի խոցման պահը։ Մյուս տեսանյութերից հետևում է, որ Սոչիի առափնյա հատվածում մի քանի պայթյուն է որոտացել, որոնց հետևանքով հրդեհներ են բռնկվել։