Վրացական «Netgazeti.ge» լրատվական գործակալությունը հոդված է հրապարակել Արդբեջանում մարդու իրավունքների վերաբերյալ։ Հոդվածում մասնավորապես անդրադարձ է կատարվել հունիսի 20-ին Ադրբեջանի արևմուտքում գտնվող Սոյուդլու գյուղում տեղի ունեցած բողոքի ակցիային, որը դաժանաբար ճնշվել է ուժայիների կողմից և ձերբակալություններ են իրականացվել։
Նշվել է, որ Ադրբեջանի իշխանությունները գնալով ավելի դաժան են վերաբերվում քաղաքացիների ցանկացած բողոքի, նույնիսկ եթե մարդիկ ուղղակիորեն չեն ընդդիմանում Ալիևի ռեժիմին:
Հոդվածում մեջբերվել են ադրբեջանական հասարակության տրամադրությունները Ադրբեջանում մարդու իրավունքների նկատմամբ՝ մատնանշելով, որ հասարակությունն այլևս չի հավատում ավելի լավ ապագային, ինչի մասին վկայում են նաև սոցցանցերում հուսահատ արձագանքները։
Հոդվածում մեջբերել են ադրբեջանցի լրագրող Սամիրա Ահմեդբեյլի տեսակետն, ըստ որի՝ մարդու իրավունքների պաշտպանության ուղղությամբ մոտ ապագայում Ադրբեջանին ոչ մի լավ բան չի սպասվում: Ահմեդբեյլի կարծիքով՝ դա կապված է միջազգային ասպարեզում Ադրբեջանի իշխանության դիրքերի ամրապնդման հետ։
«Այսօր Ադրբեջանի կառավարության դիրքերն ավելի ամուր են, քան երբևէ։ Դա պայմանավորված է բազմաթիվ գործոններով, այդ թվում՝ ադրբեջանական գազի նկատմամբ աճող պահանջարկով և Ադրբեջանի կողմից Ուկրաինային ցուցաբերվող օգնությամբ»,- ասել է Սամիրա Ահմեդբեյլը:
Հետևեք մեզ տելեգրամում
