Այսօր առավոտյան Իսրայելում ցուցարարները երկրում փակել են ճանապարհները և ցույց են անցկացրել Բեն-Գուրիոն օդանավակայանում՝ ի նշան բողոքի առ այն, որ Քնեսեթն առաջին ընթերցմամբ ընդունել է դատաիրավական բարեփոխումների վիճահարույց փաթեթը:
Ինչպես հաղորդում է The Jerusalem Post-ը, ցուցարարները մի շարք մայրուղիներ են փակել Հայֆայում, Թել Ավիվում և Երուսաղեմում: Ճանապարհներից մեկում ցուցարարները վրաններ են տեղադրել և անվանդողեր այրել: Ոստիկանները նրանց բռնի ուժով հեռացրել է մայրուղուց:
«Սա այն օրն է, երբ քաղաքացիները պետք է դուրս գան և պաշտպանեն Իսրայելի ժողովրդավարությունը», – հայտարարել է Kaplan Force բողոքի շարժումը:
«Ընդդեմ բռնապետական կոալիցիայի՝ միայն ժողովուրդը կփրկի Իսրայելը»,- շարունակել է շարժումը:
Հիշեցնենք, որ երեկ երեկոյան Իսրայելի խորհրդարանն (Քնեսեթը) առաջին ընթերցմամբ ձայների 64 կողմ և 56 դեմ հարաբերակցությամբ ընդունել է դատաիրավական բարեփոխումների փաթեթը:
Բաժանորդագրվեք մեր ալիքին Telegram-ում:
Հետևեք մեզ տելեգրամում
