Օգոստոսի 10-ին ՀՀ արտաքին գործերի նախարար Արարատ Միրզոյանը հեռախոսազրույց է ունեցել ԱՄԷ արտաքին գործերի նախարար շեյխ Աբդալլահ բին Զայեդ Ալ Նահյանի հետ։
Ինչպես հայտնում է էմիրաթական WAM պետական լրատվամիջոցը, հեռախոսազրույցի ընթացքում քննարկվել է երկու երկրների միջև երկկողմ հարաբերությունները և դրանք բոլոր ոլորտներում ընդլայնելու առկա հնարավորությունները։
Հեռախոսազրույցի վերաբերյալ հաղորդագրություն է տարածել նաև ՀՀ ԱԳՆ-ը՝ հավելելով, որ Միրզոյանն իր գործընկերոջն է ներկայացրել Լեռնային Ղարաբաղում ահագնացող հումանիտար ճգնաժամը, որը հետևանք է Ադրբեջանի կողմից Լաչինի միջանցքի՝ արդեն շուրջ 8 ամիս շարունակվող ապօրինի արգելափակման: Նախարար Միրզոյանն ընդգծել է, որ հունիսի 15-ից Լեռնային Ղարաբաղը գտնվում է լիակատար շրջափակման մեջ, որի պայմաններում ԼՂ 120 հազար բնակչությունն առերեսվում է սննդի, դեղորայքի սուր պակասին, իսկ լուրջ առողջական խնդիրներ ունեցող անձինք և 2000 հղի կանայք զրկված են հրատապ բժշկական աջակցությունից:
Արարատ Միրզոյանը շեշտել է, որ Ադրբեջանը չի իրականացնում Արդարադատության միջազգային դատարանի՝ Լաչինի միջանցքով տեղաշարժի վերականգման վերաբերյալ երկու որոշումները և արհամարհում է միջազգային գործընկերների, տարբեր կառույցների հասցեական կոչերը: Ուստի, նախարարն ընդգծել է, որ ներկայիս պայմաններում անհրաժեշտ են հստակ քայլեր, որոնց արդյունքում հնարավոր կլինի հասնել Լաչինի միջանցքի արգելափակման անհապաղ վերացման:
Նախարարները ներկայացրել են տարբեր ոլորտներում երկկողմ համագործակցության զարգացմանն ուղղված ջանքերը՝ անդրադառնալով նաև համատեղ հետաքրքրություն ներկայացնող մի շարք հարցերի և մտքեր փոխանակելով տարածաշրջանային և միջազգային զարգացումների վերաբերյալ։
Հետևեք մեզ տելեգրամում
