Իրանի պետական IRNA լրատվական գործակալությունը նախօրեին տեղեկություն էր տարածել, թե կորոնավիրուսով վարակված լինելու կասկածով Ծաղկաձորի «Գոլդեն Փելիս» հյուրանոցում մեկուսացված 32 անձինք Իրանի քաղաքացիներ են։
Այնուհետև մեկ այլ իրանական կայք, շարունակելով թեման, աշխարհաքաղաքական երանգներ է գտել «Իրանի քաղաքացիներին մեկուսցնելու մեջ»։
«Ուշագրավ է, որ Չինաստանը ԱՄՆ-ի հետ Երևանում ամենամեծ դեսպանությունը ունի, բայց երբ Հայաստանում կորոնավիրուսի տարածման մասին լուրը հրապարակվեց, նշվում էր, որ վիրուսը տարածվել է ոչ թե չինացիների, այլ իրանցիների միջոցով», – գրել էր կայքը։
«Տեղեկատվության ստուգման կենտրոնի» հարցին ի պատասխան՝ Հայաստանի Առողջապահության նախարար Արսեն Թորոսյանը հայտնել է, որ կորոնավիրուսի կասկածով մեկուսացված անձանց թվում չկան Իրանի քաղաքացիներ, վերջիններս բացառապես Հայաստանի Հանրապետության քաղաքացիներ են։
Ակնհայտ է, որ որևէ «աշխարհաքաղաքական դավադրության» մասին խոսք գնալ ևս չի կարող։ Կորոնավիրուսի դեմ պայքարը կրում է միջազգային բնույթ, անձի ազգային պատկանելությունը կամ քաղաքացիությունը որևէ նշանակություն չունեն վիրուսի դեմ պայքարում։
Հետևեք մեզ տելեգրամում
