Ռուսաստանի պաշտպանության նախարարությունը հայտարարություն է տարածել, որում Թուրքիային մեղադրել է միջազգային իրավունքի խախտման մեջ: Գերատեսչությունը որպես հիմնավորում ներկայացրել է այն փաստը, որ Թուրքիան վերջին շրջանում կտրուկ ավելացրել է իր զորքերի ու զինտեխնիկայի քանակությունը Իդլիբում, որն ըստ Թուրքիայի ու Ռուսաստանի միջև կնքված Սոչիի համաձայնագրի՝ ապառազմականացված գոտի է համարվում:
Ռուսական կողմի հայտարարության մեջ նշվում է նաև, որ ահաբեկչական խմբավորումները դիրքավորվել են Իդլիբում Թուրքիայի դիտակետերում և արդեն ամենօրյա ռեժիմով հարձակումներ են կազմակերպում Հմեյմիմում գտնվող ռուսական ավիաբազայի ուղղությամբ:
Նշենք, որ Սիրիայի Իդլիբ նահանգում իրավիճակը շարունակում է ծայրահեղ լարված մնալ. տեղի են ունենում բախումներ մի կողմից սիրիական կառավարական բանակի և մյուս կողմից թուրքական բանակային ստորաբաժանումների ու Անկարայի հովանավորության տակ գտնվող տարաբնույթ զինված խմբավորումների միջև:
Իդլիբում տեղի ունեցող զարգացումները քննարկելու ու հնարավոր հրադադարի պայմանների մասին բանակցություններ վարելու նպատակով մարտի 5-ին Մոսկվայում կհանդիպեն Ռուսաստանի ու Թուրքիայի նախագահներ Վլադիմիր Պուտինն ու Ռեջեփ Թայիփ Էրդողանը:
Հետևեք մեզ տելեգրամում
