Իսրայելական կայքերը տեղեկություն են տարածել այն մասին, որ Երևանում գործող միակ հրեական սինագոգը վանդալիզմի է ենթարկվել:
Ըստ ԶԼՄ-ների՝ նման գործողությունների պատճառը Իսրայելի և Ադրբեջանի միջև ռազմական համագործակցության ամրապնդումն է:
«Մենք չպետք է տրվենք սադրանքներին, որոնք ուղղված են հայերի և հրեաների միջև հակամարտություն հրահրելուն»,- գրել է «i24News»-ը՝ հղում կատարելով Երևանում բնակվող հրեական համայնքի հայտարարությանը:
Ուշագրավ է, որ իսրայելական կայքերը, մասնավորապես «i24News»-ը, կիսում են ադրբեջանական մամուլում տարածվող տեղեկությունն այն մասին, թե հարձակման պատասխանատվությունը ստանձնել է ASALA («Հայաստանի ազատագրության հայ գաղտնի բանակ») խմբավորումը:
Կայքերը պնդում են, որ այս ամենից զատ ASALA-ն նաև հայտարարություն է տարածել, ըստ որի՝ «եթե ԱՄՆ-ում և Եվրոպայում ռաբբիները (խմբ.՝ հուդդայականության մեջ հոգևոր առաջնորդ կամ կրոնական ուսուցիչ) շարունակեն աջակցել Ալիևի ռեժիմին, ապա մենք կվառենք այլ երկրներում գտնվող սինագոգները»:
ՀՀ արտգործնախարարությունը դատապարտել է սինագոգի վրա հարձակումը՝ հավելելով, որ «Հայաստանում անհանդուրժողականությունն ու ատելությունը տեղ չունեն»:
Նշենք, որ ոչ մի կազմակերպություն կամ խմբավորում պաշտոնապես պատասխանատվություն չի ստանձնել սինագոգի վրա իրականացված հարձակման համար: Մինչդեռ հատկապես ադրբեջանական ԶԼՄ-ները օրեր շարունակ ակտիվորեն բոլոր հարթակներում շրջանառում են այս տեղեկատվությունը: Բացի այդ՝ ադրբեջանական և թուրքական մամուլում վերջին օրերին ակտիվացել են Հայաստանում իբրև թե գործող այսպես կոչված «ահաբեկչական կազմակերպությունների» գործունեության մասին տեղեկությունները: Այսպիսով պարարտ հող է նախապատրաստվում ապագայում հնարավոր «հակաահաբեկչական գործողություններն» օրինականության շղարշով պատելու համար:
Հետևեք մեզ տելեգրամում
