Իրանում կորոնավիրուսից առաջին հայն է մահացել։ Այս մասին տեղեկացնում է «Արեւելք» լրատվականը՝ հղում կատարելով Թեհրանում սեփական աղբյուրին։
Տեղեկության համաձայն՝ Թեհրանում մեկ շաբաթ առաջ կորոնավիրուսով վարակված հայուհին՝ 85-ամյա Էլսիկ Մասիհին մահացել է: Նա գտնվում էր Թեհրանի «Մասիհ Դանեշվար» հիվանդանոցում, որ Իրանում կորոնավիրուսի վարակակիրների բուժման հիմնական հիվանդանոցն է:
Աղբյուրի համաձայն՝ կնոջ հարազատները մտավախություն ունեին, որ կորոնավիրուսից մահացած մյուս իրանցիների նման այս դեպքում էլ կառավարությունը դիակը երկար կպահի՝ հետազոտություններ կատարելու համար։ Սակայն ավելի ուշ հայտնի է դարձել, որ իրանահայ պատգամավոր Կարեն Խանլարյանի բանակցություններից հետո առողջապահության նախարարությունը խոստացել է վիրուսը մաքրելուց հետո մարմինն անմիջապես հանձնել հարազատներին՝ կրոնական արարողությամբ հուղարկավորություն կատարելու համար:
Իրանի հայկական համայնքը նույնպես մասնակցում է վարակի տարածման կանխարգելման միջոցառումներին։ Կորոնավիրուսի պատճառով փակ են Թեհրանի և Թավրիզի բոլոր հայկական դպրոցները:
Հետևեք մեզ տելեգրամում
