Կրեմլում անդրադարձել են Թուրքիայում ՌԴ դեսպան Անդրեյ Կառլովի սպանության գործով ընթացող դատավարությանը։
Կրեմլի խոսնակ Դմիտրի Պեսկովը հայտարարել է, որ ռուսական կողմը ուշադրությամբ հետևում է այդ գործին և ցանկանում է համոզված լինել, որ ռուս դիվանագետի սպանության պատվիրատուներն ու անմիջական կատարողները կհայտնաբերվեն ու կպատժվեն ըստ օրենքի։
Պեսկովը նաև հավելել է, որ Ռուսաստանը չի մեկնաբանում Թուրքիայի ներքին դատավարական գործընթացները։ Նա հայտարարել է նաև, որ որևէ տեղեկության չի տիրապետում այն մասին, թե արդյոք ռուսական հատուկ ծառայությունները զբաղվում են այս գործով։
Նշենք, որ մարտի 5-ին Անկարայի դատարանը նոր լսումներ է նշանակել ռուս դեսպանի սպանության գործով։ Հաջորդ դատական նիստը կկայանա մարտի 31-ին։ Տեղական դատախազությունը մտադիր է արդարացնել մեղադրյալներից 5-ին, մյուս 23 մեղադրյալները մեղավոր են համարվում։
Հիշեցնենք, որ Թուրքիայում Ռուսաստանի դեսպան Անդրեյ Կառլովը սպանվել էր 2016թ․ դեկտեմբերի 19-ին՝ Անկարայում կազմակերպված լուսանկարչական ցուցահանդեսի բացման ժամանակ։ Նրան հենց ելույթի ընթացքում գնդակահարել էր նախկին ոստիկան Մևլութ Մերթ Ալթընթաշը։ Կառլովի սպանության գործով դատավարությունը մեկնարկել է 2019թ․ հունվարի 8-ին։
Հետևեք մեզ տելեգրամում
