Ադրբեջանում սկսվել է կրթության նախկին նախարարի դատավարությունը

Ադրբեջանում սկսվել է 13 մարդուց բաղկացած խմբի քրեական գործով դատավարությունը, տուժողներ են ճանաչվել կրթության նախկին նախարար Միսիր Մարդանովը և «Real TV»-ի ղեկավար Միրշահին Աղաևը։

Այս մասին տեղեկացնում է ադրբեջանական APA լրատվամիջոցը՝ հավելելով, որ վերոնշյալ անձիք մտադրվել էին ստեղծել «Քերիմե» պետությունը։

«Տեղեկացվել է, որ Իրանի Իսլամական Հանրապետությունում ապրող Ռուֆուլա Ախունդզադեն և Բահթիյար Բայրամովը, որոնք համագործակցել են այդ երկրի հատուկ ծառայությունների հետ, փողի դիմաց հանձնարարություն են տվել Տերտերի շրջանի բնակիչ Արիֆ Ջումշուդովին կազմակերպել «դիմադրության ջոկատ»՝ շարիաթի օրենքներով առաջնորդվող «Քերիմե» պետության ստեղծման, զինված անկարգությունների միջոցով իշխանության զավթման և սահմանադրական կարգի տապալման համար։ Ա. Ջումշուդովը այդ գործունեության համար ներգրավել է իր ծանոթներին, որոնք կրոնական արմատականություն են քարոզում՝ Տարզան Գարաշովին, Սանան Մամեդովին, Հագանի Մամեդովին և Իղբալա Ախունդովին։ Նա ցուցումներ է տվել Ռ.Ախունդզադեին և Բ. Բայրամովին իր տանը տեղի ունեցած գաղտնի հավաքների ժամանակ։ Խմբավորման անդամները լրացուցիչ անձանց ներգրավելով, այդ մասին տեղեկացրել են Ռուֆուլա Ախունդզադեին։ Վերջինը ներգրավել է Բաքվի բնակիչ Անար Իսաևին՝ «դիմադրության ջոկատ» կազմելու առաջադրանք տալով»,- գրում է պարբերականը:

Հաղորդվել է, թե ձերբակալվածները քարոզչություն են վարել հօգուտ Իրանի և կրոնական արմատականության, կատարել են առաջադրանքներ, որոնք ստացել են արտասահմանից՝ նպատակ ունենալով խափանել «Ադրբեջանում ստեղծված հանդուրժողականության ավանդույթները»։

«Խմբավորման անդամները կազմակերպել են թմրանյութերի վաճառք, որոնք ուղարկվել են Իրանից, ստացած դրամական միջոցներն ուղղվել են կրոնական արմատականության քարոզմանը և այլ խափանարար գործունեության ֆինանսավորմանը»,- գրել է APA-ն։