Պոլսահայ մտավորական, «Ակոս» թերթի նախկին գլխավոր խմբագիր Հրանտ Դինքի սպանության ժամանակ դեպքի վայրում լինելու պատճառով ձերբակալված և հետո ազատ արձակված թուրքական ժանդարմերիայի հետախույզ Շերեֆ Աթեշը սպանվել է։ Թոշակի անցած հետախույզին արնաշաղախ վիճակում հայտնաբերել են Թուրքիայի Դյուզջե բնակավայրում՝ սեփական մեքենայի մեջ։
Թուրքական մամուլում տարածված տեղեկությունների համաձայն՝ նա ենթարկվել է զինված հարձակման։ Հարձակումն իրականացնողները արագ փախուստի են դիմել, ինչից հետո դեպքի վայր են ժամանել ոստիկանական խմբերն ու շտապ օգնության ծառայությունը։
Հիշեցնենք, որ թուրքական ժանդարմերիայի հետախույզ Շերեֆ Աթեշը, որոշ պնդումների համաձայն, Հրանտ Դինքի սպանության ժամանակ կապի մեջ էր եղել սպանությունը կազմակերպող և իրականացնող անձանց հետ, ովքեր Հրանտ Դինքի տան և նրան պատկանող «Բեյազ ադամ» գրախանութի մոտ հետևում էին Դինքին և ֆիքսում նրա տեղաշարժերը։ Սակայն դատարանի որոշմամբ Աթեշը ազատ էր արձակվել, քանի որ վերոնշյալ պնդումները դատական պրոցեսի ընթացքում հերքվել էին:
Հետևեք մեզ տելեգրամում
