Ֆրանսիացի սենատոր Վալերի Բուայեն կոշտ քննադատության է ենթարկել Ադրբեջանին՝ մեղադրելով նրան Նոր Կալեդոնիայում ապակայունացման, Արցախում էթնիկ զտումների և հայկական տարածքների բռնազավթման մեջ:
«Որոշ երկրներ շարունակում են միջամտել իրենց վարկանիշը ապօրինաբար բարձրացնելու համար։ Մենք բոլորս հիշում ենք Կատարի և Ադրբեջանի «խավիարային դիվանագիտությունն»՝ ուղղված Եվրախորհրդարանի և Եվրոպայի խորհրդի դեմ»,- X- իր միկրոբլոգում գրել է Բուայեն:
Սենատորը մատնանշել է, որ միջամտության նման ձևը նպատակ ունի ապակայունացնել ժողովրդավարությունները:
«Նոր Կալեդոնիան, օրինակ, գտնվում է Ադրբեջանի, Ռուսաստանի և Չինաստանի դաժան ազդեցության տակ, որոնք ձգտում են ապակայունացնել Ֆրանսիան և շահագործել նրա ռեսուրսները՝ օրինակ նիկելը»,- հայտարարել է ֆրանսիացի սենատորը:
Նրա խոսքով՝ հեռուստատեսության հաղորդումները ցույց են տվել, որ Նոր Կալեդոնիայի որոշ «անկախ» գործիչներ կրել են ադրբեջանական դրոշներով շապիկներ, իսկ ադրբեջանական լրատվամիջոցները հրապարակել են ցուցարարների պատկերներ՝ Ադրբեջանի նախագահ Իլհամ Ալիևի լուսանկարներով: Սենատոր Վալերի Բուայեն հավելել է, որ Ֆրանսիան դարձել է տեղեկատվական պատերազմի թիրախ, իսկ հարձակման հետևում կանգնած է Ադրբեջանը։
«Հարձակման առաջնագծում Ադրբեջանն է՝ մի երկիր, որն ունի տոտալիտար ռեժիմ՝ կախված գազի վաճառքից, Արցախում էթնիկ զտումներից, հայերի տեղահանումից և միջազգայնորեն ճանաչված պետության ինքնիշխանության ոտնահարումից»,- շարունակել է սենատորը:
«Հաշվի առնելով Նոր Կալեդոնիայում տիրող իրավիճակն՝ առաջարկում եմ, որ 2022 թվականին խորհրդարանի և Սենատի կողմից քվեարկված Ադրբեջանի ակտիվների սառեցումը վերջապես ուժի մեջ մտցնել, իսկ այդ միջոցներն ուղղել վնասը վերականգնելու համար, որը Նոր Կալեդոնիայում կազմում է գրեթե 1 միլիրադ եվրո»,- ասել է Բուայեն։
Հետևեք մեզ տելեգրամում
