Իսրայելի բանակցային պատվիրակության անդամը պնդել է, որ ՀԱՄԱՍ-ի պահանջը, թե Իսրայելը կդադարեցնի պատերազմը՝ հրադադարի հասնելու համար, «զառանցանք» է:
«Դա տեղի չի ունենա», – հայտարարել է անանուն պաշտոնյան՝ իսրայելական «Ynet» լրատվամիջոցին:
«Իսրայելը կռվում է Գազայում, կշարունակի պայքարել իր ողջ ուժով, և եթե նրանք [խմբ.՝ ՀԱՄԱՍ] ցանկանում են զինադադար, դա պետք է լինի միայն պատանդների ազատ արձակման շուրջ բանակցությունների միջոցով»,- հավելել է պաշտոնյան:
Նշենք, որ օրեր առաջ ՀԱՄԱՍ-ը հայտարարություն էր տարածել՝ պատրաստակամություն հայտնելով «ամբողջական համաձայնության հասնել, որը ներառում է համապարփակ փոխանակման գործարք», սակայն չի կարող բանակցել, քանի դեռ Իսրայելը շարունակում է «պաղեստինցի ժողովրդի նկատմամբ ագրեսիան, պաշարումը, սովամահությունը և ցեղասպանությունը»:
Հիշեցնենքո, որ Իսրայելի և ՀԱՄԱՍ-ի միջև միջնորդավորված բանակցությունները՝ հրադադարի հաստատման և գերիների փոխանակման շուրջ, դադարեցվել են շաբաթներ շարունակ, իսկ կողմերից յուրաքանչյուրը մեղադրում է մյուսին հետընթաց գրանցելու մեջ:
Հետևեք մեզ տելեգրամում
