Թուրքիայում գործող «Ակօս» շաբաթաթերթի կայքում հրապարակվել է թերթի խմբագիր Եդվարդ Տանձիկյանի հոդվածը՝ «Սահմանին տեղի ունեցած հանդիպումը ոգևորություն առաջացրեց, բայց․․․» վերնագրով։
Հոդվածում Տանձիկյանն անդրադառնում է հայ-թուրքական սահմանին տեղի ունեցած հատուկ ներկայացուցիչների հանդիպմանը, նշելով, որ սկզբում այն բավականին ոգևորություն առաջացրեց, հանդիպումից հետո արված հայտարարությունները նույնպես դրական էին, սակայն ակնհայտ է, որ Թուրքիան կարգավորման գործընթացում նախապայման է առաջ քաշում ՝ այն կապելով Հայաստանի և Ադրբեջանի միջև ընթացող բանակցությունների հետ։
«Ինչքան էլ որ Հայաստանը ցանկանում է սահմանը բացել և կարգավորել հարաբերությունները Թուրքիայի հետ, թուրքական կողմից փոխադարձ քայլեր չի տեսնում։ Այս հարցում, կարծես թե, Թուրքիան Ադրբեջանի հավանությանն է սպասում, քանի որ Ադրբեջանի և Հայաստանի միջև նույնպես կարգավորման գործընթաց կա և այստեղ Ադրբեջանը Հայաստանի առջև պայմաններ է դրել, և գործընթացում առաջընթաց չկա։ Բացի այդ Թուրքիան և Ադրբեջանը դեռ շարունակում են համառել «Զանգեզուրի միջանցքի» հարցում»,-գրել է նա։
Ըստ հեղինակի՝ չնայած նրան, որ Ռուբինյանի և Քըլըչի վերջին հանդիպումից հետո հայտարարություն արվեց, որ երկու ներկայացուցիչները ևս մեկ անգամ ընդգծում են իրենց համաձայնությունը՝ շարունակելու կարգավորման գործընթացը առանց որևէ նախապայմանի, որպեսզի հասնեն երկրների միջև լիարժեք կարգավորման վերջնական նպատակին, իրականում այս հարցում ամենահստակ հայտարարությունն արել է Թուրքիայի արտգործնախարար Հաքան Ֆիդանը «Sabah» -ի հետ հարցազրույցում՝ նախապայման դնելով կարգավորման գործընթացում և դա պայմանավորելով Հայաստանի և Ադրբեջանի միջև ընթացող բանակցություններով։
«Ուստի, երբ իրականացվում է պարտադրող քաղաքականություն, որը կստիպի Հայաստանի վարչակազմին գնալ էլ ավելի շատ զիջումների, դա չի հանգեցնում կարգավորման գործընթացի։ Ավելի շուտ դա վերածվում է Փաշինյանի վարչակազմի ու Հայաստանի վրա ճնշում գործադրելու քաղաքականության»,- ընդգծել է Տանձիկյանը ։
Հետևեք մեզ տելեգրամում
