Թուրքական մամուլ. «Ֆրանսիայի նոր վարչապետը թուրքերին համարում է թշնամի»

Ֆրանսիայի նախագահ Էմանուել Մակրոնը երկրի նոր վարչապետ է նշանակել Միշել Բարնիեին։ Նա հանձնարարել է նրան ստեղծել միասնական կառավարություն, որը կծառայի երկրին ու ֆրանսիացի ժողովրդին։

Բարնյեն նախկինում աշխատել է որպես Ֆրանսիայի արտաքին գործերի նախարար և շուկաների և ծառայությունների եվրոպական հանձնակատար:

73-ամյա գործիչը «Բրեքզիթ»-ի հարցով ԵՄ-ի նախկին գլխավոր բանակցողն է և բանակցություններ է վարել Մեծ Բրիտանիայի կառավարության հետ 2016-2019 թվականներին:

Բարնիեն կլինի Ֆրանսիայի ամենատարեց վարչապետը Հինգերորդ Հանրապետության ստեղծումից (1958 թվական) ի վեր: Նա կփոխարինի Գաբրիել Աթթալին՝ Ֆրանսիայի ամենաերիտասարդ վարչապետին, որին Մակրոնը նշանակել էր 2024 թվականի սկզբին։

Ուշագրավ է, որ Բարնիեի նշանակումը հայտնվել է թուրքական մամուլի ուշադրության կենտրոնում։ Բազմաթիվ թուրքական կայքեր Ֆրանսիայի նոր վարչապետին անվանել են «թուրքերի թշնամի» և նշել, որ նա բազմիցս խոսել է Հայոց ցեղասպանության եղելիության մասին։