Իրանում շարունակում են նոր տիպի կորոնավիրուսով վարակվել բարձրաստիճան պաշտոնյաներ։ Իրանի խորհրդարանական ընդդիմադիր խմբակցության ղեկավար Մուհամեդ Ռըզա Թաբեշը իրանական լրատվամիջոցին տված հարցազրույցում հայտնել է, որ պատգամավորները և խորհրդարանի աշխատակազմը կորոնավիրուսի թեստեր են հանձնել։
Թաբեշի խոսքով՝ թեստերի արդյունքում Իրանի խորհրդարանի 11 պատգամավորի մոտ կորոնավիրուս է հայտնաբերվել։ Նա նաև նշել է, որ դեռևս չեն հայտարարվել բոլոր թեստերի պատասխանները, սակայն կանխատեսում են, որ ևս 50 պատգամավոր վարակված կլինի համավարակով։
Նշենք, որ ավելի վաղ Իրանում 23 պատգամավոր վարակվել էր կորոնավիրուսով։ Իրանի Մեջլիսի ղեկավար Ալի Լարիջանիի կորոնավիրուսի թեստի պատասխանը նույնպես դրական էր եղել:
Հիշեցնենք, որ Իրանում գրանցվել էր կորոնավիրուսից պաշտոնյայի առաջին մահը: Հիվանդության զոհ էր դարձել Իրանի հոգևոր առաջնորդ Ալի Խամենեիի խորհրդական Մոհամմադ Միրմոհամադին։
Հետևեք մեզ տելեգրամում
