Եթե Վրաստանի նախագահ Սալոմե Զուրաբիշվիլին որոշի երկրում նոր խորհրդարանական ընտրություններ նշանակել, որոնց համար իրավական հիմքեր չկան, դա իր դեմ քրեական պատասխանատվության կհանգեցնի, ճեպազրույցի ժամանակ հայտարարել է վարչապետ Իրակլի Կոբախիձեն։
«Կարծում եմ, որ Սալոմե Զուրաբիշվիլին բավականաչափ խելամտություն կունենա և՛ Քրեական օրենսգիրքն անձամբ չխախտելու, և՛ թույլ չտալու որևէ մեկին խախտել այնպիսի նորմերը, որոնք նախատեսում են երկարաժամկետ ազատազրկում։ Քրեական օրենսգրքում կան համապատասխան հոդվածներ, որոնք նման արարքի համար նախատեսում են երկարաժամկետ ազատազրկում։ Կրկին կասեմ, ինչ-որ խելացի մեկը խորհուրդ է տվել Սալոմե Զուրաբիշվիլիին չանել դա»,-ասել է Կոբախիձեն։
Կառավարության ղեկավարն ընդգծել է նաև, որ ոչ ոք չի ցանկանում 72-ամյա կնոջը բանտ ուղարկել, բայց եթե նա, այնուամենայնիվ, գնա այս քայլին,ինքն իրեն կդատապարտի։
Նշենք, որ դեկտեմբերի 21-ին նախագահ Զուրաբիշվիլին, որի լիազորությունների ժամկետը լրանում է դեկտեմբերի 29-ին, հանդիպել է ընդդիմության առաջնորդների և հասարակական կազմակերպությունների ներկայացուցիչների հետ։ Հանդիպմանը կողմերը քննարկել են երկրում նոր ընտրությունների անցկացման թեման։ Նույն պահանջը Զուրաբիշվիլին կրկնել է դեկտեմբերի 22-ին երեկոյան խորհրդարանի շենքի դիմաց տեղի ունեցած բողոքի ցույցի ժամանակ։
Հետևեք մեզ տելեգրամում
