Թուրքիայի արտաքին գործերի նախարար Հաքան Ֆիդանը Դամասկոսում հանդիպում է ունեցել Սիրիայի նոր առաջնորդ Ահմեդ ալ-Շարաայի հետ։
Այս մասին հայտնում են Թուրքիայի ԱԳՆ դիվանագիտական աղբյուրները։
Հանդիպմանը մասնակցել են նաև Թուրքիայի փոխարտգործնախարար Նուհ Յըլմազը, Դամասկոսում Թուրքիայի դեսպանատան գործերի ժամանակավոր հավատարմատար Բուրհան Քյորօղլուն և Սիրիայի ժամանակավոր կառավարության ԱԳ նախարար Էսաադ Հասան Շեյբանը։
Հաքան Ֆիդանը Դամասկոսում Սիրիայի նոր իշխանությունների ղեկավար Ահմեդի հետ հանդիպումից հետո կայացած մամուլի ասուլիսում ասել է.
«Այսօր միջազգային հանրությունը, հատկապես տարածաշրջանի երկրները, պետք է մոբիլիզացվեն՝ Սիրիայի վերականգնումն ապահովելո և միլիոնավոր փախստականներ վերադարձի համար: Սիրիայում նախկին ռեժիմի դեմ սահմանված բոլոր պատժամիջոցները պետք է անհապաղ չեղարկվեն։ Ներդրումները, ֆինանսավորումը, ենթակառուցվածքները և առողջապահական և կրթական ծառայությունները պետք է հնարավորինս արագ տրամադրվեն: Որպեսզի փախստականները վերադառնան, Սիրիայում հրատապ պետք է սկսվեն վերակառուցման աշխատանքները: Որպես Թուրքիա՝ մենք պատրաստ ենք փոխանցել մեր փորձը պետական հաստատությունների վերակազմավորման և կարողությունների ձևավորման ոլորտում։ Ցանկանում ենք աջակցել կոնկրետ աշխատանքներին մեր այնպիսի հաստատությունների միջոցով, ինչպիսիք են Թուրքիայի համագործակցության և համակարգման գործակալությունը TIKA), Կարմիր մահիկը (Kızılay) և Աղետների և արտակարգ իրավիճակների վարչությունը (AFAD), ինչպես նաև մեր մասնավոր ընկերությունների միջոցով»,- ասել է Ֆիդանը:
Ֆիդանը հավելել է, որ Սիրիայում Թուրքիայի կողմից ահաբեկչական համարվող խմբավորումները պետք է ինքնալուծարվեն։
«Առաջին հերթին արաբական երկրները, ինչպես նաև ողջ միջազգային հանրությունը պետք է աշխատեն Սիրիայի նոր կառավարության հետ։ «Սպասիր և տես» սկզբունքով գործելու ժամանակը չէ։ Մենք պետք է անմիջապես գործենք։ Սիրիայի տարածքային ամբողջականության և միասնության հարցում որևէ տարակուսանք չկա և չի կարող լինել։ Սիրիայի նկատմամբ պատժամիջոցները պետք է վերացվեն։ Միջազգային հանրությունը պետք է գործի՝ Սիրիան ոտքի կանգնեցնելու համար։ Իսրայելը պետք է հարգի Սիրիայի ինքնիշխանությունն ու տարածքային ամբողջականությունը և չպետք է տարածաշրջանային անվտանգությունն ավելի մեծ ռիսկի ենթարկի։ Միջազգային հանրությունը պետք է կոնկրետ արձագանք տա Իսրայելի ապօրինի գործողություններին»,- հավելել է նա։
Հետևեք մեզ տելեգրամում
