Իրանի նախագահ Մասուդ Փեզեշքիանն ընդունել է Ադրբեջանի փոխվարչապետ Շահին Մուստաֆաևի գլխավորած պատվիրակությանը: Փեզեշքիանը երկու երկրների հարաբերություններն որակել է որպես բարեկամական, եղբայրական և կրոնական ու ազգակցական կապերի վրա հիմնված:
«Իրանի և Ադրբեջանի ժողովուրդների ջերմ հարաբերությունները դուրս են աշխարհագրական սահմաններից, և այդ հարաբերությունները միշտ եղել են ու կլինեն շարունակական»,-նշել է Փեզեշքիանը։
Մատնանշելով Իրանի արտաքին քաղաքականությունում Ադրբեջանի հատուկ տեղը՝ Փեզեշիքանը ասել է.
«Որպես սկզբունքային քաղաքականություն՝ ԻԻՀ օրակարգում է հարևան և մուսուլմանական երկրների հետ կապերի և փոխգործակցության զարգացումը, և այդ առումով Ադրբեջանի հետ հարաբերությունները մեզ համար առանձնահատուկ նշանակություն ունեն, և մենք ձգտում ենք ընդլայնել հարաբերությունները։
Ադրբեջանի փոխվարչապետն իր հերթին նշել է, որ անցած տասնամյակների ընթացքում Ադրբեջանը ջանք չի խնայել ԻԻՀ հետ հարաբերություններն ընդլայնելու համար, իսկ մյուս կողմից՝ այն կարևոր փոփոխությունները, որոնց ականատես եղան Փեզեշքիանի նախագահության այս կարճ ժամանակահատվածում, երկկողմ հարաբերություններում և տարածաշրջանի իրադրությունում պայծառ ապագա են խոստանում:
Ադրբեջանի փոխվարչապետը Իրանի և Ադրբեջանի միջև հարաբերությունների ամրապնդման և զարգացման հիմնական գործոնն ու շարժառիթն է համարել երկու երկրների կրոնական և մշակութային ընդհանրությունները, բարեկամական ու եղբայրական հարաբերությունները։
«Երախտագիտություն հայտնելով տարածաշրջանում խաղաղության և կայունության հաստատման գործում ԻԻՀ ազդեցիկ դերակատարման համար՝ կարծում ենք, որ մեր տարածաշրջանի խնդիրների լուծումը հնարավոր կլինի միայն այս տարածաշրջանի երկրների կողմից, իսկ օտար երկրների ներկայությունը ոչ մի օգուտ չի տա այս ուղղությամբ»,-ասել է Մուստաֆաևը՝ ընդգծելով, որ այս այցի ընթացքում հետամուտ են Իրանի հետ առևտրատնտեսական հարաբերություններն էլ ավելի ընդլայնելու համար ճանապարհային քարտեզի մշակմանը և ցանկանում են երկու երկրների միջև ռազմավարական համագործակցություն ստեղծել:
Մուստաֆաևը Փեզեշքիանին է փոխանցել Բաքու այցելելու Ալիևի հրավերը:
Հետևեք մեզ տելեգրամում
