Այսօր՝ փետրվարի 6-ին Իսրայելի պաշտպանության նախարար Իսրայել Կացը կարգադրել է բանակին նախապատրաստել Գազայի հատվածից բնակիչների «կամավոր հեռանալը» թույլ տալու ծրագիր: Տեղեկությունը հայտնում են իսրայելական ԶԼՄ-ները:
«Ես ողջունում եմ նախագահ Թրամփի համարձակ ծրագիրը: Գազայի բնակիչներին պետք է ազատություն տրվի հեռանալու և արտագաղթելու, ինչպես դա ընդունված է ամբողջ աշխարհում», – նախարարի խոսքերը մեջբերում է իսրայելական «Channel 12-ը»-ը:
Հարցին, թե ովքեր են ընդունելու պաղեստինցիներին, Կացն ասել է, որ դրանք պետք է լինեն այն երկրները, որոնք դեմ են եղել Գազայում Իսրայելի ռազմական գործողություններին:
«Այն երկրները, ինչպիսիք են Իսպանիան, Իռլանդիան, Նորվեգիան և այլք, որոնք մեղադրանքներ և կեղծ պնդումներ են ներկայացրել Իսրայելի դեմ Գազայում նրա գործողությունների առնչությամբ, օրինականորեն պարտավոր են թույլ տալ Գազայի ցանկացած բնակչի մուտք գործել իրենց տարածքներ», – հայտարարել է Իսրայելի պաշտպանության նախարարը:
«Channel 12»-ը հաղորդում է, որ Կացի ծրագիրը կներառի ցամաքային ճանապարհով անցնելու տարբերակներ, ինչպես նաև ծովով և օդով մեկնելու հատուկ միջոցառումներ:
Հիշեցնենք, որ վերջին օրերին Թրամփը բառացիկ հայտարարություն է արել՝ ասելով, թե Գազայի բնակիչները պետք է հեռանան այդ հատվածից: Գազան կանցնի ԱՄՆ վերահսկողության ներքո: Այս առաջարկը լիովին ողջունել է իսրայելական կողմը: Դեմ են արտահայտվել Ռուսաստանը, Չինաստանը և Գերմանիան՝ հավելելով, որ այս առաջարկը «նոր տառապանք և ատելություն» կբերի:
Սաուդյան Արաբիան ուղղակիորեն մերժել է այս առաջարկը: Հորդանանի թագավոր Աբդալլահը, ով հաջորդ շաբաթ Սպիտակ տանը կհանդիպի Թրամփին, հայտարարել է, որ մերժում է հողը բռնակցելու և պաղեստինցիներին տեղահանելու ցանկացած փորձ:
Հետևեք մեզ տելեգրամում
