ՌԴ ԱԳ նախարար Սերգեյ Լավրովը երեքշաբթի աշխատանքային այցով կայցելի Իրան, հայտնում է ՌԴ ԱԳՆ-ն։
«Փետրվարի 25-ին ՌԴ ԱԳ նախարար Սերգեյ Լավրովն Իրանի Իսլամական Հանրապետության արտաքին գործերի նախարար Աբբաս Արաղչիի հրավերով աշխատանքային այցով կայցելի Թեհրան»,-ասված է ՌԴ ԱԳՆ կայքում հրապարակված հաղորդագրության մեջ։
Այցի ընթացքում Սերգեյ Լավրովը և Աբբաս Արաղչին կքննարկեն ռուս-իրանական հարաբերությունների երկկողմ օրակարգը։
«Բանակցությունների ընթացքում նախատեսվում է հատուկ շեշտադրում անել փոխշահավետ առևտրատնտեսական համագործակցության հետագա ընդլայնման վրա՝ էներգետիկայի և տրանսպորտի ոլորտներում առանցքային համատեղ նախագծերի իրականացման համատեքստում»,-հավելել է ՌԴ ԱԳՆ-ից։
Բացի այդ, նախատեսվում է մտքերի փոխանակում մի շարք միջազգային հարցերի, այդ թվում՝ Սիրիայում, Հարավային Կովկասում, Աֆղանստանում, Եմենում, Պարսից ծոցում ստեղծված իրավիճակի վերաբերյալ, քննարկել մերձավորարևելյան կարգավորումը, Կասպյան հիմնախնդիրը և Իրանի միջուկային ծրագիրը:
Հետևեք մեզ տելեգրամում
