Հայաստանի համար դժվար է ազդել Երուսաղեմի հայկական թաղամասի շուրջ ստեղծված իրավիճակի վրա։ Այս մասին ասուլիսում ասել է ՀՀ սփյուռքի գործերի գլխավոր հանձնակատար Զարեհ Սինանյանը՝ հավելելով, որ պատճառներից մեկը Իսրայելի հետ նոր հաստատված դիվանագիտական հարաբերություններն են:
Սինանյանը նշել է, որ Երուսաղեմի Հայոց պատրիարքության համար ձևավորվել են նոր հարկային պարտավորություններ։
«Ինչպես գիտեք, մինչ այս խնդիրներ կային պատրիարքարանի տարածքների անհասկանալի փոխանցման, դրան առնչվող դատական գործերի հետ կապված։ Այսօր էլ տեսնում ենք, որ Երուսաղեմի քաղաքապետարանը 80-ական թվականներից սկսած հարկային պարտավորություններ է ներկայացրել պատրիարքարանին՝ պնդելով, որ չեն վճարվել որոշ հարկեր։ Պահանջում են կլորիկ գումար, որը չվճարելու դեպքում կլինեն կոնկրետ հետևանքներ։ Դա նշանակում է, որ այդ պարտքը, հավանաբար, գույքի, տարածքի միջոցով պետք է մարվի, ինչը ճակատագրական կարող է լինել Երուսաղեմի հայկական ներկայության համար»,- հավելել է Սինանյանը։
Նա հիշեցրել է, որ այդ հայկական թաղամասը ձեռք է բերվել հայ բարերարների՝ մի քանի հարյուրամյակի ընթացքում կատարված շռայլ ներդրումների ու ծանր ջանքերի շնորհիվ։
«Դա հսկայական առավելություն է։ Հայերը կարողացել են մի ամբողջ թաղամաս ձեռք բերել և հիմա կանգնած ենք կորուստներ ունենալու վտանգի առաջ։ Այդ խնդիրները, իհարկե, տեղում են առաջանում, կապված չեն Հայաստանի Հանրապետության հետ, սակայն նման դեպքերում հաճախ են դիմում մեր կառավարությանը, որ լուծումներ առաջարկվեն։ Պատկերացրեք, թե որքան դժվար է Հայաստանի համար որևէ ձևով ներազդել այս իրավիճակի վրա, երբ նոր է սկսում դիվանագիտական հարաբերություններ հաստատել Իսրայելի հետ»,- ասաց նա։
Ավելի վաղ Երուսաղեմի Հայոց պատրիարքարանը հայտնել էր, որ Իսրայելի իշխանությունները փորձում են բռնագրավել եկեղեցու ունեցվածքը ենթադրյալ աստղաբաշխական պարտքի պատճառով։
Հետևեք մեզ տելեգրամում
