Մինչ պաշտոնական Բաքուն իր գործելոճին հավատարիմ կերպով ապատեղեկատվություն է տարածում և Հայաստանին մեղադրում է հրադադրի խախտման մեջ, թուրքական ԶԼՄ-ները փաստում են հակառակը՝ Հայաստանի կառուցողական և խաղաղությանը միտված քաղաքականությունը տարածաշրջանի երկրների հետ հարաբերություններում։
«Հայաստանի վարչապետ Նիկոլ Փաշինյանը վերահաստատել է իր երկրի պատրաստակամությունը՝ արագորեն կարգավորելու Թուրքիայի հետ հարաբերությունները՝ տարածաշրջանային խաղաղության և կայունության համատեքստում»,- գրում է թուրքական պարբերականը։
Լրատվամիջոցը գրում է, որ Հայաստանը չի ընդունում այսպես կոչված «Զանգեզուրի միջանցք» ձևակերպումը՝ դա համարելով որպես տարածքային պահանջ Ադրբեջանի կողմից, սակայն միաժամանակ շեշտում է, որ Հայաստանն ինքն է ձգտում ունենալ հաղորդակցային և տրանսպորտային գծեր տարածաշրջանում, որոնք կարող են միմյանց կապել բոլոր երկրներին։
Պարբերականը փոխանցում է Ն․ Փաշինյանի խոսքերը, որ նոյեմբերի 9-ի հայտարարությունը չի ենթադրում որևէ «միջանցքի» տրամադրում։ Ներկայացնում է Փաշինյանի քննադատությունն ուղղված Ադրբեջանին այսպես կոչված «արևմտյան Ադրբեջանի» կեղծ խոսույթի, Հայաստանի ինքնիշխան և միջազգայնորեն ճանաչված տարածքի նկատմամբ նկրտումների հետ կապված։
Լրատվամիջոցը շեշտում է ՀՀ վարչապետի ընդգծումը, որ Հայաստանին և հայ ժողովրդին անհրաժեշտ է խաղաղություն այս տարածաշրջանում։
Մեկ այլ հոդվածում ներկայացվում է պաշտոնական Երևանի դիրքորոշումն առ այն, որ Թուրքիայի հետ սահմանի բացումը կարող է փոխել խաղը և խթանել տարածաշրջանային խաղաղությունն ու կայունությունը, եթե Անկարան կատարի դեռևս 2022թ․-ին ձեռք բերված պայմանավորվածությունը։
Հետևեք մեզ տելեգրամում
