Դամասկոսի օդանավակայանում ձերբակալել են Սիրիայի նախկին մուֆթիին

Սիրիայի անցումային կառավարության անվտանգության ուժերը Դամասկոսի միջազգային օդանավակայանում ձերբակալել են հանրապետության նախկին գերագույն մուֆթի Շեյխ Ահմադ Բադր Ալ -Դին Հասսունին։ Կրոնական գործիչը փորձել է փախչել երկրից, հաղորդում է Սիրիա հեռուստաընկերությունը։

Sham FM ռադիոյի փոխանցմամբ՝ Շեյխ Հասունն ուղևորվում էր Ամման, որտեղ պետք է շտապ վիրահատության ենթարկվեր։ Ըստ ռադիոկայանի՝ նախկին մուֆթին իշխանություններին նախապես հայտնել է բուժման նպատակով Հորդանան մեկնելու իր ցանկության մասին,սակայն օդանավակայանի VIP սրահ ժամանելուց մի քանի րոպե անց նրան ձերբակալել են։

Նույն օրը, անվտանգության ուժերը շրջայցեր են իրականացրել Դամասկոսի հին հատվածում՝ այնտեղ թաքնված նախկին նախագահ Բաշար ալ-Ասադի կողմնակիցներին ձերբակալելու նպատակով։ Հատուկ գործողության ընթացքում ձերբակալվել է մի քանի մարդ, որոնց մոտ հայտնաբերվել են կենսական նշանակության հաստատություններում պայթեցնելու համար պատրաստված զենք, զինամթերք և պայթուցիկ սարքեր։