Իսրայելը պատրաստ է «վաղը» դադարեցնել պատերազմը Գազայում՝ պատանդների ազատ արձակման և Գազայի հատվածում` ՀԱՄԱՍ-ի ներկայության դադարեցման դիմաց: Այս մասին հայտարարել է Իսրայելի արտգործնախարար Գեդեոն Սաարը՝ Փարիզում իր ֆրանսիացի գործընկեր Ժան-Նոել Բարոյի հետ հանդիպումից հետո։
«Մենք դեռևս հնարավորություն ենք տալիս բանակցել հրադադարի երկարաձգման և մեր պատանդների ազատ արձակման վերաբերյալ՝ հիմնվելով [ԱՄՆ հատուկ բանագնաց Սթիվ] Վիտկովի առաջարկի վրա, բայց դա անժամկետ չէ», – նախազգուշացրել է նա՝ նկատի ունենալով առաջարկը, որը կապահովի 5 իսրայելցի պատանդների ազատ արձակումը։
Իսրայելական կողմը պնդում է, որ Գազայի հատվածում պաղեստինյան խմբավորումները շարունակում են պահել իսրայելցի 59 պատանդ:
Ավելի վաղ՝ մարտի 18-ին Իսրայելը վերսկսեց Գազայի հատվածի ինտենսիվ ռմբակոծումը, այնուհետև սկսեց նոր ցամաքային հարձակում՝ վերջ դնելով ՀԱՄԱՍ-ի հետ պատերազմում գրեթե երկամսյա հրադադարին:
Հետևեք մեզ տելեգրամում
