ՈՒԵՖԱ-ն Վրաստանի ֆուտբոլի ֆեդերացիային տուգանել է 40 հազար եվրոյով Հայաստանի հետ խաղից հետո տեղի ունեցած միջադեպի համար։ Վրաստանի ֆուտբոլի ֆեդերացիայի կայքում տեղադրված հաղորդագրության մեջ նաև ասվում է, որ Վրաստանի հավաքականը պետք է տնային մեկ հանդիպում անցկացնի առանց հանդիսականների: Որակազրկումը կվերաբերի Ազգերի լիգայի նոր՝ 2026/2027 մրցաշրջանի առաջին տնային հանդիպմանը։
Տուգանքը չի տարածվում 2025 թվականի աշնանը կայանալիք աշխարհի առաջնության ընտրական խաղերի և ՖԻՖԱ-ի հովանու ներքո անցկացվող միջազգային ընկերական խաղերի վրա։
ՈՒԵՖԱ-ի որոշումը նախատեսում է նաև երկու տարի փորձաշրջան: Եթե նման խախտումները կրկնվեն երկու տարվա ընթացքում, ապա Վրաստանի հավաքականը հերթական հանդիպումը կանցկացնի առանց հանդիսականների։
Հիշեցնենք, որ մարտի 23-ին Թբիլիսիի «Դինամո Արենայում» ՈւԵՖԱ–ի ազգերի լիգայի 2024-2025 խաղարկության անցումային փլեյ–օֆֆ փուլի Վրաստան–Հայաստան պատասխան հանդիպումից հետո վրացի երկրպագուները սկսեցին շշեր և աղբ նետել Հայաստանի հավաքականի ֆուտբոլիստների ու հայ երկրպագուների ուղղությամբ, քաշքշուկ սկսվեց։
Հետևեք մեզ տելեգրամում
