Եվրախորհրդարանը հոկտեմբերի 8-ին 445 կողմ ձայնով բանաձև է ընդունել՝ դատապարտելով Վրաստանի իշխող «Վրացական երազանք» կուսակցության՝ ընդդիմադիր քաղաքական ուժերի գործունեությունն արգելելու նախաձեռնությունը։ Այս մասին հայտնում է Civil.ge-ն։
«Region Monitor»-ի փախանցմամբ՝ վերոնշյալ բանաձևով Եվրախորհրդարանը պահանջում է անհապաղ հետ վերցնել ընդդիմադիր կուսակցությունների արգելման վերաբերյալ Սահմանադրական դատարան ներկայացված հայցը։
Փաստաթղթում նշվում է, որ նախաձեռնությունը նպատակ ունի վերացնել քաղաքական բազմակարծությունը և Վրաստանում հաստատել միակուսակցական համակարգ։
Եվրախորհրդարանը նաև կոչ է արել նպատակային պատժամիջոցներ և վիզային սահմանափակումներ կիրառել «Վրացական երազանքի» հիմնադիր Բիձինա Իվանիշվիլիի, վարչապետ Իրակլի Կոբախիձեի, խորհրդարանի նախագահ Շալվա Պապուաշվիլիի և Թբիլիսիի քաղաքապետ Կախա Կալաձեի նկատմամբ։
Բանաձևում պահանջվում է անհապաղ և անվերապահ ազատ արձակել քաղաքական բանտարկյալ համարվող անձանց, այդ թվում՝ նախկին նախագահ Միխեիլ Սաակաշվիլիին, ընդդիմադիր գործիչներ Էլենե Խոշտարիային, Նիկա Մելիային և լրագրող Մզիա Ամաղլոբելիին։
Եվրախորհրդարանը մտահոգություն է հայտնել Վրաստանում ժողովրդավարության, մարդու իրավունքների և մամուլի ազատության վիճակի վատթարացման կապակցությամբ՝ ընդգծելով, որ ընդդիմադիր կուսակցությունների արգելման փորձերը խոչընդոտում են երկրի եվրոպական ինտեգրմանը։
Միաժամանակ վերահաստատվել է աջակցությունը Վրաստանի ժողովրդի եվրոպական ձգտումներին։
Հետևեք մեզ տելեգրամում
