«Տնտեսության և խաղաղության ինստիտուտը» (Institute for Economics & Peace, IEP) հրապարակել է 2025 թվականի Գլոբալ խաղաղության ինդեքսը, ըստ որի՝ աշխարհում ընդհանուր խաղաղության մակարդակը շարունակում է նվազել: Ըստ զեկույցի՝ մարդկությունն այժմ կանգնած է գլոբալ կարգի խորքային վերաձևակերպման առջև։
Հետազոտության համաձայն՝ ներկայումս կա 59 ակտիվ պետական հակամարտություն, ինչը ռեկորդային է՝ Երկրորդ համաշխարհային պատերազմից ի վեր։ Վերջին տասը տարիների ընթացքում 100 երկրում խաղաղության մակարդակը զգալիորեն նվազել է։
Երկրները գնահատվել են՝ հաշվի առնելով ինչպես ներքին ցուցանիշները (հանցավորության մակարդակ, սպանությունների և բողոքի ակցիաների թիվ), այնպես էլ արտաքին գործոնները (բանակի ծախսեր, միջուկային զենքի առկայություն, հարևանների հետ հարաբերություններ և այլն)։
2025-ին աշխարհի ամենախաղաղ երկիրն Իսլանդիան է՝ պահպանելով այս կարգավիճակը 2008 թվականից ի վեր։ Իռլանդիան զբաղեցրել է երկրորդ հորիզոնականը, առաջին հնգյակում են նաև Նոր Զելանդիան, Ավստրիան և Շվեյցարիան։
Ինդեքսի համաձայն՝ Հայաստանը զբաղեցրել է 58-րդ տեղը՝ համեմատաբար բարելավելով իր դիրքը նախորդ տարվա համեմատ։ Հայաստանի խաղաղության ընդհանուր միավորը կազմում է 1.893, ինչը ենթադրում է 10 հորիզոնականով առաջընթաց։
Հայաստանը գերազանցել է տարածաշրջանի մի շարք երկրների, այդ թվում՝ Վրաստանի (109-րդ), Ադրբեջանի (95-րդ) և Թուրքիայի (146-րդ) ցուցանիշները։ Մասնավորապես, Թուրքիան զիջել է նույնիսկ Պակիստանին՝ հայտնվելով ինդեքսի վերջին հորիզոնականներում։
Հայաստանը տարածաշրջանային մակարդակով դասվել է Արևելյան Եվրոպայի և Կենտրոնական Ասիայի երկրների շարքում, որտեղ խաղաղության մակարդակը ընդհանուր առմամբ նվազել է։ Սակայն Հայաստանը այս ցուցանիշով մնում է առաջատարներից մեկն տարածաշրջանում։
Միևնույն ժամանակ, զեկույցը նաև ընդգծում է, որ աշխարհի խաղաղության ընդհանուր պատկերը մնում է տագնապալի՝ հաշվի առնելով շարունակվող պատերազմները, ռազմավարական լարվածությունները և միջազգային հարաբերությունների սրումը։
Հետևեք մեզ տելեգրամում
