Պաղեստինյան ՀԱՄԱՍ շարժումն Իսրայելի հետ հրադադարի առաջարկին դրական պատասխան է տվել միջնորդներին: «Արմենպրես»-ի փոխանցմամբ՝ այս մասին հաղորդել է Իսրայելի Ynet լրատվական հարթակը:
Ըստ պարբերականի՝ շարժման որոշման մասին կհայտարարվի առաջիկա ժամերին:
Ավելի վաղ արմատականներն իրենց Telegram ալիքում հայտնել էին, որ շարժումն ուսումնասիրում է այն առաջարկները, որոնք միջնորդներից ստացվել են Իսրայելի հետ Գազայի հատվածում հրադադարի շուրջ անուղղակի բանակցությունների ժամանակ: ՀԱՄԱՍ-ը չի հայտնել, թե հատկապես ինչ են բովանդակում քննարկվող նախաձեռնությունները: Ընդ որում, զինյալները պնդում են, որ հնարավոր համաձայնագիրը պետք է ներառի «Գազայում հրադադարի երաշխիքներ, այնտեղից իսրայելական զորքերի դուրսբերում և մարդասիրական օգնության մուտք անկլավ»:
Հուլիսի 2-ին Maan լրատվական գործակալությունը հաղորդել էր, որ Գազայի վերաբերյալ նոր առաջարկը նախատեսում է 60-օրյա հրադադար, 10 պատանդների ազատ արձակում, 18 զոհված պատանդների մարմինների փոխանցում իսրայելական կողմին և իսրայելական բանակի ջոկատների հետքաշում շրջափակված անկլավի հարավում գտնվող «Մորագ» գծից, որն ընկած է Ռաֆահ և Խան Յունիս քաղաքների միջև:
Հետևեք մեզ տելեգրամում
