Իրանում ՀՀ դեսպան Գրիգոր Հակոբյանը հանդիպել է Թեհրանի համալսարանի ռեկտորի պաշտոնակատար Մոհամմադ Հոսեյն Օմիդի հետ։
Օմիդին ընդգծել է, որ Հայաստանն ու Իրանը պատմականորեն ունեցել են բարեկամական ու լավ հարաբերություններ, սակայն գիտական ոլորտում համագործակցությունը, ի տարբերություն քաղաքական հարաբերությունների, փայլուն և խորը չի եղել։ Նա հույս է հայտնել, որ երկու երկրների համալսարանների պաշտոնյաների ջանքերով այդ համագործակցությունը կխորանա։ Օմիդին կլիմայի փոփոխության, ջրի ճգնաժամի խնդիրները համարել է լուրջ մարտահրավեր և ընդգծել, որ երկու երկրների համալսարանները կարող են համատեղ ուսումնասիրություններ կատարել ու լուծումներ գտնել։ Նա նաև ուսանողների, դասախոսների փոխանակման ծրագրերի իրագործման պատրաստակամություն է հայտնել։
Օմիդին նշել է, որ սա նոր պաշտոնում օտարերկրյա ներկայացուցիչների հետ առաջին հանդիպումն է, և ուրախ է, որ այն բարեկամական ու վաղնջական հարևան Հայաստանի դեսպանի հետ է կայանում։
Դեսպան Գրիգոր Հակոբյանն իր հերթին ընդգծել է, որ հայ-իրանական հարաբերությունները գտնվում են բարձր մակարդակում և պետք է ջանքեր գործադրել նաև գիտության, կրթության ոլորտում համագործակցության զարգացման համար և այդ ուղղությամբ հայկական կողմի պատրաստակամությունը հայտնել։ Հակոբյանը նշել է, որ ՀՀ համալսարաններում կան իրանագիտության բաժիններ, և առաջարկել, որ Իրանում էլ հայոց լեզվի ու գրականության բաժին լինի։ Նա հայտնել է, որ շուտով ՀՀ նախարարներ են այցելելու Իրան և նրանց կառաջարկի, որպեսզի գիտական համագործակցության հարցը ևս լինի օրակարգում։
Հետևեք մեզ տելեգրամում
