Միացյալ Նահանգները պետք է փոխհատուցեն այն վնասի համար, որ Իրանը կրել է ամերիկյան զինված ուժերի վերջին հարձակումների հետևանքով։ Այս մասին Financial Times պարբերականին տված հարցազրույցում հայտարարել է Իրանի արտաքին գործերի նախարար Աբբաս Արաղչին։
«Նրանք պետք է բացատրեն, թե ինչու հարձակվեցին մեզ վրա բանակցությունների փուլում, և նրանք պետք է վստահեցնեն, որ չեն կրկնելու դա [ապագա բանակցությունների ընթացքում]։ Նրանք պետք է փոխհատուցեն պատճառած վնասի համար»,- հայտարարել է Արաղչին։
Նա նկատել է, որ Վաշինգտոնի հետ բանակցությունների հավանականությունը շարունակում է պահպանվել, սակայն Թեհրանում շատերը կասկածամտորեն են մոտենում ԱՄՆ-ի դիվանագիտական նախաձեռնություններին։
«Բանակցություններ տանող ճանապարհը նեղ է, բայց դա անհնարին չէ։ Ես պետք է համոզեմ իմ ղեկավարությանը, որ եթե մենք գնում ենք բանակցությունների, մյուս կողմն էլ պետք է դրան մոտենա իրական վճռականությամբ, որպեսզի հասնենք երկու կողմի համար ցանկալի լուծման։ Մենք կարիք ունենք նրանց կողմից իրական վստահություն կառուցող միջոցների»,- ասել է Իրանի ԱԳ նախարարը։
Դիվանագետի պնդմամբ՝ հակառակ Իրանի դեմ վերջին հարձակումներին, Թեհրանը պահպանել է ուրանի հարստացման կարողությունները։ «Շենքերը կարող են վերակառուցվել։ Մեքենաները կարող են փոխարինվել, քանի որ մենք ունենք տեխնոլոգիաները։ Մենք ունենք բավարար գիտնականներ ու մասնագետներ, ովքեր սովոր են աշխատել մեր կառույցներում։ Սակայն թե երբ ու ինչպես կվերսկսենք հարստացման աշխատանքները, կախված են պայմաններից»,- նշել է Արաղչին։
Նա անդրադարձել է նաև եվրոպական երկրների հետ բանակցություններին՝ նշելով․ «Եվրոպացիների հետ այս պահին բանակցելու ոչ մի իմաստ չկա, քանի որ նրանք չեն կարող վերացնել պատժամիջոցները, նրանք ոչինչ չեն կարող անել։ Եթե նրանք գործարկեն snapback-ի մեխանիզմը (խմբ․ – այն ենթադրում է Իրանի դեմ ՄԱԿ-ի Անվտանգության խորհրդի պատժամիջոցների վերականգնում), ապա դա նրանց համար ճանապարհի վերջը կդառնա»։
Հետևեք մեզ տելեգրամում
