Ավստրալիան երկրում Իրանի դեսպան Ահմադ Սադեղիին հայտարարել է անցանկալի անձ, իսկ Իսլամական Հանրապետությունում Ավստրալիայի դեսպանատունը դադարեցնում է իր գործունեությունը անվտանգության նկատառումներից ելնելով։ Այս մասին մամուլի ասուլիսի ժամանակ հայտարարել է Ավստրալիայի արտաքին գործերի նախարար Փենի Վոնգը:
Ըստ Ավստրալիայի հետախուզության՝ Իրանը «կանգնած է Ավստրալիայում հրեական համայնքի դեմ հակասեմական հարձակումների հետևում»։ Իրանը, ենթադրաբար, ներգրավված է Մելբուռնի սինագոգի և Սիդնեյի կոշեր ռեստորանի վրա հարձակումներում։
«Կասկած չկա, որ ավստրալական հողի վրա ագրեսիայի այս կոպիտ և վտանգավոր գործողությունները, որոնք գլխավորում է մեկ այլ պետություն, անցել են սահմանը։ Հետևաբար, Իրանի դեսպանը հայտարարվել է անցանկալի անձ»,-ասել է Վոնգը։
Դիվանագետը նշել է, որ Սադեղին և իրանցի ևս երեք պաշտոնյաներ պետք է լքեն Ավստրալիան յոթ օրվա ընթացքում։ Նախարարը շեշտել է, որ Կանբերրան մտադիր է Իրանի հետ պահպանել «որոշակի դիվանագիտական կապեր»: Երկրորդ համաշխարհային պատերազմից ի վեր սա առաջին դեպքն է, երբ Ավստրալիայից արտաքսվում է մեկ այլ երկրի դեսպան։ Թեհրանում գտնվող ավստրալիացի դիվանագետները նախկինում տարհանվել են «երրորդ երկրներ»։
Հետևեք մեզ տելեգրամում
