Վրաստանի ենթակառուցվածքների նախարարության տվյալներով՝ ակտիվորեն շարունակվում է Քվեշեթի-Կոբի մայրուղու շինարարությունը։ Այս նոր մայրուղին թույլ կտա կրճատել ճանապարհորդության ժամանակը և անվտանգ դարձնել երթևեկությունը վրաց-ռուսական սահմանի ուղղությամբ մայրուղով։
«Նախագծի շրջանակներում շարունակվում է Գուդաուրի տանող 5 կիլոմետրանոց նոր ճանապարհի կառուցումը, որը զգալիորեն կբարելավի հանգստավայրի հասանելիությունը։ Քվեշեթի-Կոբի մայրուղու բացումից հետո ձմռանը Կոբի ուղղությամբ երթևեկությունը չի սահմանափակվի։ Քվեշեթի-Կոբի հատվածը կարելի է հաղթահարել 15 րոպեում՝ մեկ ժամվա փոխարեն։ Թբիլիսիից Գուդաուրի ճանապարհը կտևի մեկ ժամ 30 րոպե՝ երկուսի փոխարեն, իսկ Թբիլիսիից Ստեփանծմինդա՝ մեկ ժամ 45 րոպե՝ երկուսուկեսի փոխարեն»,- ասված է հաղորդագրության մեջ։
Նախագիծն իրականացվում է Ասիական զարգացման բանկի և Վերակառուցման և զարգացման եվրոպական բանկի վարկով՝ պետական բյուջեի համաֆինանսավորմամբ։ Ընդհանուր արժեքը կազմում է 1,2 միլիարդ լարի։ Շինարարությունը նախատեսվում է փուլ առ փուլ ավարտել 2025-2026թթ։
Հետևեք մեզ տելեգրամում
