Երևանի քաղաքապետ Տիգրան Ավինյանը հայտնել է, որ Երևանը կունենա 18 մետրանոց 250 նոր էլեկտրական ավտոբուս։ Դա մտնում է Երևանի քաղաքապետարանի ռազմավարության մեջ։ Այդ ավտոբուսները փոխարինելու են Higer ավտոբուսներին և «Գազել սիթի»միկրոավտոբուսներին։
Ավինյանի խոսքով, այդպես լուծվում է ոչ միայն շարժակազմի թարմացման և համալրման հարցը, այլև էլեկտրական ավտոբուսները զրո ազդեցություն ունեն օդի որակի վրա։
Ինչ վերաբերում է էլեկտրական մեքենաների վերաբերյալ ռազմավարությանը, ապա նպատակ ունեն ներքին այրման շարժիչով մեքենաները փոխարինել էլեկտրական տրանսպորտով։
«Մենք տրամաբանություն ունենք, որ հնարավորինս փորձելու ենք էլ ավելի խրախուսել էլեկտրական մեքենաների և էլեկտրական տրանսպորտի ավելացումը քաղաքում՝ փոխարինելով ներքին այրման շարժիչով մեքենաները»,-ասել է նա՝ հիշեցնելով, որ ձմռան ամիսներին Երևանում օդի որակի հետ կապված խնդիրներ են առաջանում, որոնց պատճառներից մեկը մեքենաներն են։
Հետևեք մեզ տելեգրամում
