Գազայի ավերակների տակ առնվազն 20,000 չպայթած զինամթերք կա

Իսրայելի կողմից Գազայի հատվածի երկու տարի շարունակվող հրետակոծությունից հետո ավերակների տակ ավելի քան 20,000 չպայթած հրետանային արկեր, ռումբեր և ականներ կան: Այս մասին հայտարարել է Գազայի վարչակազմի մամուլի ծառայության ներկայացուցիչը:

«Նախնական գնահատականներով՝ առնվազն 20,000 պայթուցիկ առարկաներ, այդ թվում՝ հրետանային արկեր, ականներ, ռումբեր և հրթիռներ, որոնք Իսրայելի բանակը արձակել է Գազայի ուղղությամբ, թաղված են ավերված շենքերի փլատակների տակ և բնակելի տարածքներում»,-հայտարարել է մամուլի ծառայության ներկայացուցիչը՝ նշելով, որ բոլոր չպայթած զինամթերքները «իրական վտանգ են ներկայացնում ինչպես իրենց տները վերադարձող տեղի բնակիչների, այնպես էլ ավերակները մաքրող աշխատողների և մասնագետների համար»:

«Մինչև ավերակները մաքրել սկսելը, մենք պետք է մանրակրկիտ ինժեներական և սակրավորական հետազոտություն անցկացնենք Գազայի հատվածի գրեթե բոլոր բնակեցված տարածքներում»,-ասել է նա՝ պարզաբանելով, որ Գազայում ներկայումս կա 65-70 միլիոն տոննա շինարարական աղբ, շինարարական բեկորներ, արդյունաբերական կառույցներ, բնակելի շենքերի և քաղաքային ենթակառուցվածքների ավերակներ։